විනීතා එම් ගමගේ
 
රටේ අභිවෘද්ධිය වෙනුවෙන් කටයුතු කරන්නට අගමැතිවරයා හෝ ජනාධිපතිවරයා යන දෙදෙනාම සුදුසු නැති බවත් ඔවුන් දෙදෙනාම විධායක ජනාධිපති ධුරයට ඉව අල්ලමින්  සිටින බවත් ඔප්පු වී ඇතැයි පුරවැසි බලය සම කැඳවුම්කරු මහාචාර්ය සරත් විජේසූරිය මහතා ප්‍රකාශ කළේය. 
 
එහෙත් මිලිටරි පාලනයක් හෝ ජාතිවාදය මුල්කරගත් පාලනයක් මේ රටට ගැලපෙන්නේ නැතැයි ද හෙතෙම කියා සිටියේය. 
 
විජේසූරිය මහතා මේ අදහස් පල කළේ මරදාන සමාජ හා සාමයික කේන්ද්‍රයේ අද  පැවැති පුරවැසි බලය මාධ්‍ය හමුවක දීය.  එහි දී තව දුරටත් අදහස් දැක්වූ සරත් විජේසූරිය මහතා මෙසේ ද පැවැසීය.
 
‘‘අපි බලකර කියා සිටින්නේ විධායක ජනාධිපති ක්‍රමය අහෝසි කිරීමට පාර්ලිමේන්තුවේ පෙළ ගැසෙන ලෙසයි. ජාතිවාදී බලවේගවලට ජනතාව ත්‍රස්ත කරන්න දොරගුළු හැර දෙන්න එපා. ජනාධිපති හා අගමැති පොරොන්දු ඉටු කර නැහැ. අරමුණු ඉටු නොකර අලංකාර කතා කියන ජනාධිපති දැන් මොනවද කරන්නේ? 
 
රටේ අභිවෘද්ධිය පතන සියලූ දෙනා 20 වැනි සංශෝධනයට පක්ෂ විය යුතුයි. 
 
සියල්ල අසාර්ථක කරගත් ඔහු වෙන දෙයක් තබා ශ්‍රී ලංකා නිදහස් පක්ෂ්‍යට නායකත්වය දෙන්න පවා එතුමාට බැරි වුණා. දැන් බලන්නේ කවර අන්දමින් හෝ  බලය තබා ගන්නයි. 
 
හිටපු නීතිය හා සාමය පිළිබඳ ඇමතිත් අධිකරණ ඇමතිත් රාජකාරිය ඉටු කරන අය වීම නිසා අගමැතිට අවශ්‍ය වුණා තමන්ට හීලෑ කරගත හැකි දෙදෙනෙක් මේ තනතුරුවලට ගෙන එන්න. 
 
හිටපු ජනාධිපතිවරයා විවේචනය කරල මෙතනට ආ තලතා මේ වනවිට විශේෂ අධිකරණ පිහිටුවීමෙන් වළකින්නට කරුණු ඉදිරිපත් කරනවා. මෙතන තියෙන්නේ අමාත්‍යවරිය ගේ වරදක් නොවෙයි, අග්‍රමාත්‍යවරයාගේ නරක අදෘශ්‍යමාන මැදිහත්වීමයි. මහින්ද රාජපක්ෂ මහතා හා ඔහුට අදාළ නඩු පසෙකලා ඔහුගේ පිහිටෙන් හෝ බලයට එන උවමනාවයි තිබෙන්නේ. ‘‘