අනීෂා මානගේ
 
මාධ්‍ය ආයතන පිළිබදව සොයාබලා ඒවා මර්දනය කිරීමට එක් එක් ඇමැතිවරුන් බාර ගෙන ඇතැයි ද රට බෙදීමට ඉඩ නොදී කටයුතු කිරීමට මාධ්‍යයටද වගකීමක් ඇතැයි හිටපු ජනාධිපති මහින්ද රාජපක්ෂ මහතා අද(16) තංගල්ල කාර්ල්ටන් නිවෙසේ දී පැවැති ජනහමුවකදී පැවසුවේය. 


එහිදී වැඩිදුරටත් අදහස් දැක්වූ මහින්ද රාජපක්ෂ මහතා මෙසේද කීය. 


අද ආණ්ඩුව සූදානම් වෙනවා මාධ්‍ය මර්දනය කරන්න. ඇමැතිවරු එක එක්කෙනා එක එක පත්තරයට දාලා. පසුගිය කාලයේදී පත්තරවල මොනවද ගියේ, මොන ආකාරයට ද ඒව ඉදිරිපත් කරල තිබුණේ, රූපවාහිනි ආයතන වලින් මේව මොන ආකාරයට ද ඉදිරිපත් කළේ, මේ දේවල් පාලනය කරන්නේ කොහොමද කියන එක ගැන පසුගියදා සාකච්ඡා කරලා එක එක ඇමැතිවරු බාර අරගෙන තියෙනවා ඒවා පිළිබඳව සොයාබලා මාධ්‍ය මර්දනයට. ඒ 20 වැනි සංශෝධනය ගේන වෙලාවට. එයයි ඔවුන්ගේ අවසාන තීරණය. මේ රට බෙදන්න ඉඩ නොදී කටයුතු කරන්න මාධ්‍යයටත් අපිටත් සියලුම දෙනාට වගකීමක් තිබෙනවා.


රනිල් වික්‍රමසිංහ මහත්තයා අගමැති විදියට දිවුරුම් දුන්නා. අපි එතුමාටත් සුබ පතනවා. දෙයියන්ගේ පිහිටෙන් අපේ රට බේරගන්න තමයි අපිට වෙලා තියෙන්නේ එතුමාගෙන්. අපි එතුමාට කියනව අපි ඒකත් කරනවා කියලා. එතුමා හිතපු නැති වෙලාවක අපි මේක පෙරළුවා. පෝයට පෙරළනවා කියපු නිසා. අපි ඒ වැඩෙත් කළා. ඊළගට අපි මේ ආණ්ඩුවත් පෙරළනවා කියන එක මම මතක් කරනවා යැයිද කීය.