(තිලකරත්න දිසානායක)

රටේ ජනතාවට අද ජීවත්වීමට සිදුවී ඇත්තේ සෑහෙන පීඩනයකින් බවත්, බලාපොරොත්තු නොවුණ ආකාරයට රට ප‍්‍රපාතයට වැටෙමින් තිබෙන බවත් හිටපු ජනාධිපති සහ කුරුණෑගල දිස්ත‍්‍රික් පාර්ලිමේන්තු මන්ත‍්‍රී මහින්ද රාජපක්ෂ මහතා ගම්පහ ඔරුතොට දී පෙරේදා (8) පැවසීය.

තම ධුර කාලයේ උතුරේ සහ නැගෙනහිර වෙඩි හඬ නැවැත්තුව ද අද උතුරෙත් දකුණෙත් වෙඩි හඬ ඇසෙන්නේ යැයි ද හිටපු ජනාධිපතිවරයා කීවේය.

ගම්පහ, ඔරුතොට කෝට්ටෙගොඩ සිරිවර්ධනාරාම රජමහා විහාරස්ථානයේ ඉදිකරන ලද චෛත්‍යයෙහි කොත පැළඳවීම හිටපු ජනාධිපතිවරයාගේ ප‍්‍රධානත්වයෙන් පෙරේදා (8) පැවැති අතර, ඉන් අනතුරුව පැවැති උත්සවය අමතා මහින්ද රාජපක්ෂ මහතා එසේ කීය.

පිඹුරේ උදිත කල්‍යාණි සාමග‍්‍රී ධර්ම මහා සංඝ සභාවේ මා නාහිමි සහ ලන්ඩන් තේම්ස් බෞද්ධ විහාරාධිපති යටවත්ත පුරාණ රාජමහා විහාරාධිපති පහළගම සෝමරතන, එක්සත් රාජධානියේ ප‍්‍රධාන සංඝනායක හිමියෝ මුලසුන හෙබවූ මෙම උත්සවයේදී රාජපක්ෂ මහතා මෙසේ ද පැවසීය.

පන්සල් අභාවයට නොයා රැක ගන්න නම් අපේ දායක දායිකාවන් පන්සල කෙරෙහි මීට වඩා අවධානය යොමු කිරීම ඉතාමත්ම වැදගත් වෙනවා. මොකද, එහෙම නැත්නම් අපට විතරයි නියමයක් නැත්තේ පන්සල් යන්නට. අනෙක් හැම ආගමකම තිබෙනවා ඉරිදට පල්ලියට පැමිණිය යුතුයි කියලා. සිකුරාදට එන්න  ඕන පල්ලියට කියලා. මේවා නියමයන්. අපි පෝය දවසෙ නිවාඩු දුන්නා පන්සල් යන්නට. අඩුම ගානෙ පෝයදාට වත් පංසලට යන්නේ නැහැ.

එදාට ඉස්සෙල්ල දවසෙ ඇතැමුන්ගෙන් තැබෑරුමෙ පෝලිම වැඩි වෙනවා. ඒක තමයි අපේ සමාජයේ වසර 2500ක් බණ කියලා, හැමදාම උදේට සවසට සුරාපානය නොකරනවයි කියලා පොරොන්දු වෙලා අපිට ගිහින් තියෙන කල. අපිට රටක් ගොඩනගන්න නම් විනයක් තිබිය යුතු සේම විනය රැකීමේ වගකීම සමාජයට හා රජයට තිබෙනවා. ඒවාගේම භික්ෂුන් වහන්සේලා ඊට මගපෙන්වන්නට පියවර ගැනීමේ වගකීමකුත් තියෙනවා.

අද වගේ වෙහෙරක් විහාරයක් ගොඩනැගෙනවයි කිව්වම අපිට සතුටක් ඇති වෙනවා. මෙහි කොත පැළඳි මොහොතේ මට හිතුණේ අපි ඉදිකළ සඳහිරු සෑයෙ කොත පැළඳවීමට අපට තිබුණා නම් කොච්චර නම් හොඳ ද කියලයි.

එහි ඉදිකිරීම් දැන් සිදුවන්නේ බොහොම හිමින්. කවුරු හෝ වැඩක් කළෝතින් රජයක වගකීම තමයි ඒ වැඩය අවසන් වන තුරුම කරගෙන යෑම. අපි විශාල වැඩ කොටසක් කරගෙන ගියා. පසුගිය දිනක මම දුටුව අපි හදපු පාලම්, සමහර බෝක්කු හදන්න ගත්තුව අතරමග නැවතී තිබෙනවා. මේවා ජාතික අපරාධ.

ඊටත් වඩා අපරාධයක් ලෙසින් තමයි මම දකින්නේ සඳහිරු සෑය ගොඩනැගීම ප‍්‍රමාද කිරීම. මෙය ඉක්මනින් ඉදිකළොත් එතුමාට එය ඇරඹිය හැකියි. අපිටත් සාධු කිව හැකියි. ඒක නිසා මේ කාර්ය භාරය කඩිනමින් ඉටු වේවායි අපි ප‍්‍රාර්ථනය කරනවා.

අද රටේ ජනතාව සෑහෙන පීඩනයකින් ජිවත් වෙනවා. අද ඉතාමත්ම අසීරු කාලයක් උදාවී තිබෙනවා. මේ කාලය තුළදී අපි බලාපොරොත්තු නොවුණ ආකාරයට රට ප‍්‍රපාතයට වැටෙමින් තිබෙනවා. අපරාධ වැඩිවෙමින් තිබෙනවා. මිනීමැරුම් වැඩි වෙමින් තිබෙනවා. අපි උතුරේ, නැගෙනහිර වෙඩි හඬ නැවැත්තුවට අද උතුරෙත් වෙඩි හඬ, දකුණෙත් වෙඩි හඬ.

අද එකවර තොග ගණන් මැරෙනවා. මේවා වැළැක්වීමේ කටයුතු කළ යුතුයි. කතා කර කර හිටියට මදි. යමක් වූවාට පසුව වරද වෙනත් අයට පැටවීමෙන් ඇති වැඩක් නැහැ. ඒවා සොයා බලා කටයුතු කිරීමේ වගකීමක් රජයකට තිබෙනවා.

අද සියලූම දේ එෆ්.සී.අයි.ඞීය සහ සිර ගෙවල්වල කරන්නට හදනවා. මේ උත්සවය සුදානම් කරන විටත් එෆ්.සී.අයි.ඩිය ඇවිත් ප‍්‍රශ්න කර තිබෙනවා. මෙය නීත්‍යානුකූල නොවන ආයතනයක්. ඒක අගමැතිවරයා යටතේ ක‍්‍රියාත්මක වන ආයතනයක්. ඒ ආයතනය ඇත්තේ දේශපාලනඥනයින්ගෙන් පළිගැනීමට හැර වෙනත් කිසි දේකට නොවෙයි.

දැන් විමල් වීරවංශ මහත්තයා හිරේ. එතුමා වරදක් කරලයි කියා මා දකින්නේ නැහැ. නමුත් කළයි කියන වරද එලෙසින්ම කරපු පාර්ලිමේන්තුවේ තිදෙනෙක් ඉන්නවා. ඒ අය නිදහස්. මොකක්ද මේ කරන්නේ කියා සමාජයට අවබෝධයක් තිබිය යුතුයි.

අපි අද ඉතාමත් සතුටට පත්වෙනවා මෙම විහාරස්ථානය දියුණුවට පත්කිරීම සඳහා කටයුතු කිරීම ගැන. මෙහි සංඝාවාසයක් ඉදිකර දීමට දායකයින්ටත් වගකීමක් තිබෙනවා.

මෙහිදී අදහස් දැක්වූ ගම්පහ ප‍්‍රාදේශීය සභාවේ හිටපු සභාපති රංජිත් ගුණවර්ධන මහතා:-

මෙම විහාරස්ථානයේ චෛත්‍යයෙහි කොත නිරාවරණය කිරීමේ උත්සවය සංවිධානය කරන විට අපිට තර්ජන ගර්ජන ආවා. තොරණ ගහන්න එපාය කිව්වා. කොඩි දාන්න එපාය කිව්වා. නමුත් මහින්ද රාජපක්ෂ අපේ නායකයා වෙනුවෙන්  ඕනෑම තර්ජනයකට ගර්ජනයකට මුහුණ දෙන්නට අපි සූදානම්.

මෙම උත්සවය සංවිධානය කිරීමට අවශ්‍ය පහසුකම් සලසන ලෙස ප‍්‍රසන්න රණතුංග, සරණ ගුණවර්ධන යන මහත්වරුන්ගෙන් මට උපදෙස් ලැබුණා. මහින්ද රාජපක්ෂ මහත්මයා වෙනුවෙන් උපරිමයෙන් උත්සවය අපි සංවිධානය කළා.

මෙම ආගමික උත්සවයේදි පහළගම සෝමරතන නාහිමි, විහාරාධිකාරී වරාවැවේ සුධම්ම හිමි අනුශාසනාවක් පැවැත් වූ අතර, වෑගෙදර සරණතිස්ස හිමියෝ පිළිගැනීම සිදු කළහ.

මෙම අවස්ථාවට පිඹුරේ උදිත නාහිමි සහ අමන්දොළුවේ ධම්මරතන නාහිමි ද වැඩමවා සිටි අතර, පාර්ලිමේන්තු මන්ත‍්‍රී ප‍්‍රසන්න රණතුංග, පළාත් සභා මන්ත‍්‍රී ලක්ෂ්මන් ගුණවර්ධන, ගම්පහ ප‍්‍රාදේශීය සභාවේ හිටපු උප සභාපති ජයන්ත මුදන්නායක යන මහත්වරු ද පැමිණ සිටියහ.