(දයාරත්න ඇඹෝගම)

මෛත්‍රීපාල සිරිසේන ජනාධිපතිවරයා හා රනිල් වික්‍රමසිංහ අග්‍රාමාත්‍යයවරයා ඇතුළු පාර්ලිමේන්තුවේ මන්ත්‍රිවරුන් 225 දෙනාම බෞද්ධ ආගමට තිබිය යුතු ස්ථානය අනිවාර්යෙන්ම ලබා දෙන බව ශ්‍රි ලංකා නිදහස් පක්ෂයේ මහ ලේකම් කෘෂිකර්ම අමාත්‍ය දුමින්ද දිසානායක මහතා පවසයි.

එයට අබමල් රේණුවක අඩුවක් හෝ අවැඩක් සිදුවිමට ඉඩ නොතබන බව ද ඒ මහතා කීය.

අමාත්‍යවරයාගේ අනුරාධපුර නිවසේ අද (25) පැවති හිටපු පළාත් පාලන නියෝජිතයන් දැණුම්වත් කිරීමේ රැස්වීමකට එක්වෙමින් ඒ මහතා මේ බව පැවසීය.

 

“මේ රට බෞද්ධ රටක් කියන එක මේ රටේ ජීවත් වෙන අන්‍ය ආගමිකයෝ දන්න කාරණයක්.ඒකට කවුරුත් අභියෝග කරන්න සූදානම් වෙලත් නෑ, සූදානම් වෙන්නෙත් නෑ කියන කාරණාව අපි සිහිපත් කළ යුතු වෙනවා.

ඒ වගේම ව්‍යවස්ථා සංශෝධනය ගමට එතරම් බලපෑවේ නැති වුණාට හැම ජනාධිපතිවරණයකදීම, පාර්ලිමේන්තු මැතිවරණයකදීම ව්‍යවස්ථා සංශෝධනය ගැන කථා කරනවා.2000 දි චන්ද්‍රිකා මැතිණිය ව්‍යස්ථාව ගෙන ආවා, එක්සත් ජාතික පක්ෂය ඇතුළු විරුද්ධ පක්ෂ එකට එකතු වෙලා ඒක ගිනි තියලා ඒක පාර්ලිමේන්තුවේදීම නැවැත්තුවා

ව්‍යවස්ථා සංශෝධනය ගැන කථා කරන විට අපේ මහා සංඝරත්නය වැරදි බියක් ඇති කර ගෙන තිබෙනවා.ව්‍යවස්ථා සංශෝධනයෙන් බෞද්ධාගමට තියෙන තැන නැති වෙනවාද කියන කාරණාව සම්බන්ධයෙන්.

මේ පිළිබදව ජනාධිපතිවරයා අවස්ථා කීපයකදීම ස්වාමීන් වහන්සේලා වැඩම කර සිටි උත්සව රාශියකම මතක් කළා මේ ව්‍යවස්ථාව තුළ බුද්ධාගමට හෝ සිංහල ජාතියට, මේ රට තුළ ජීවත් වන අන්‍ය ආගමිකයින්ට මේ ව්‍යවස්ථා සංශෝධනය තුළින් කිසිම අසාධාරණයක් වෙන්නෙ නෑ කියන ප්‍රතිඥාව ලබා දී තිබෙනවා.

විශේෂයෙන්ම බෞද්ධ ආගමට තිබිය යුතු තැන, දීලා තිබුණ තැන අනිවාර්යෙන්ම තියෙනවා කියන එක සහතික වෙලා තියෙනවා.නමුත් අපේ රටේ මොන අවාසනාවකටද දන්නේ නෑ හොද දේ ගැන නෙමයි නරක දේ ගැන තමයි කථා බහ කරන්නේ.මේ ව්‍යවස්ථා කෙටුම්පතක්වත් නෙමෙයි, මේක යෝජනාවක් පමණයි, උදාහරණයක් ලෙස ගත්තොත් ගම සංවර්ධනය කරන්නේ කොහොමද කියලා ගමේ කට්ටිය එකතු වෙලා සාකච්ජාවක් කරනවා.ඒ සාකච්ජාවේදී එක එක්කෙනා එක එක යෝජනා කරනවා.මේ මොන යෝජනාවද අවසානයේ ක්‍රියාත්මක කරන්නේ කියන එක තාම කෙටුම්පත් කරලත් නෑ, තාම තීන්දු කරලත් නෑ.

ඉදිරියේදී මේ ව්‍යවස්ථාවේ යෝජනාවලිය අනුරාධපුර දිස්ත්‍රික්කයේ සෑම පන්සලකටම ලබා දීමට මම බලාපොරොත්තු වෙනවා.එතකොට අපේ හාමුදුරුවරුන්ට මේක කියවලාම බලාගන්න පුලුවන්කම තියෙනවා මොනවාද මේ යෝජනා, මේ යෝජනා සාධාරණද? අසාධාරණද ? මොකක්ද මතය කියන කාරණාව කථා බහ කරන්න පුළුවන්කම තියෙනවා.මහා සංඝරත්නයේ ආශිර්වාදය, මතය අපිට අවශ්‍යයයි.

ඉදිරි පළාත් පාලන මැතිවරණය කොට්ඨාශ ක්‍රමයට පවත්වනවා වගේම,  ඉදිරි පළාත් සභා හා පාර්ලිමේන්තු මැතිවරණ ආසන ක්‍රමයට පැවත්විමට රජය සැළසුම් කර තිබෙනවා.“යැයි ඒ මහතා ප්‍රකාශ කරයි.