(නිශාන්ත කුමාර  සහ  ඩී.කේ රත්න)

පළාත් සභාවක් නොමැතිව ප්‍රදේශයේ  සංවර්ධන කටයුතු කරගෙන යෑම දුෂ්කර කටයුත්තක් බවත් පළාත් සභා මැතිවරණය පවත්වා පළාත් සභා පිහිටුවිය යුතු බවත් ඌව පළාත් ආණ්ඩුකාර අධිනීතිඥ රාජා කොල්ලුරේ මහතා  අද  (05) බදුල්ලේ දී පැවසීය.

එසේම 2020 වසරේදී ඌව පළාතේ වී නිෂ්පාදනය  මෙට්‍රික් ටොන්  63000 ක් දක්වා වැඩිකිරීමට සැලසුම් කර ඇතැයිද ආණ්ඩුකාරවරයා පැවැසීය.

ආණ්ඩුකාරවරයා මෙම අදහස් පළ කළේ ඌව පළාතේ    මාධ්‍යවේදීන් සමඟ බදුල්ල  ප්‍රදේශයේ පැවැති හමුවකට එක්වෙමිණි.

එහිදී වැඩිදුරටත් අදහස් දැක්වූ ආණ්ඩුකාරවරයා මෙසේ ද කීය

      ‘‘13 වන  ව්‍යවස්ථා සංශෝධනය අනුව ආණ්ඩුකාරවරයාට යම් බලතල තිබෙනවා.

ආණ්ඩුකාරවරයා  යනු මධ්‍යම ආණ්ඩුවේ ජනාධිපතිවරයා ගේ නියෝජිතයායි.  ආණ්ඩුකාරවරයා ජනාධිපතිවරයාගේ නිර්දේශ අනුව ක්‍රියා කිරීමට  බැඳී සිටිනවා. නමුත් සංවර්ධන කටයුතු වගේම අන පනත් සම්මත කර ගන්නට  පළාත් සභාවක් අවශ්‍යයි.

ඒ වගේම  මේ වන විට  ‍මෙට්‍රික් ටොන්   60800 ක් වන වන ඌව පළාතේ වී නිෂ්පාදනය 2020 වසරේදී මෙට්‍රික් ටොන්     63 000 ක් දක්වා වැඩි කිරීමට අප කටයුතු කරනවා.

මේ වනවිට රටේ අර්තාපල් නිෂ්පාදනයෙන් සියයට 40 ක් වගා කරන්නේ ඌව පළාත තුළයි. නමුත් තවමත් රටේ අල අවශ්‍යතාව පිරවීමට එය ප්‍රමාණවත් නැහැ. ඉදිරියේදී ගොවි ජනතාවට සහන ලබා දීම තුළින් අල අස්වැන්න වැඩි කරන්නටත් අපි කටයුතු කරනවා.‘‘ යැයි ආණ්ඩුකාරවරයා පැවසීය.