(නිමල කොඩිතුවක්කු)

විපක්ෂයේ දුර්වලතාවය උපයෝගී කරගනිමින් මෙතෙක් පනත් සම්මත කරගත් ආකාරයට රටට අහිතකර අයුරින්  20 වන  ආණ්ඩුක‍්‍රම ව්‍යවස්ථාව සම්මත කරගැනීමේ උත්සාහයක වත්මන් ආණ්ඩුව නිරත වන බවට ජාතික සංවිධාන එකමුතුව චෝදනා කරයි.

20වන  ආණ්ඩුක‍්‍රම ව්‍යවස්ථාව මගින් 13 වන ආණ්ඩුක‍්‍රම ව්‍යවස්ථාව සම්පූර්ණයෙන් බලාත්මක කිරීමේ උත්සාහයක් ක‍්‍රියාත්මක බවද ජාතික සංවිධාන එකමුතුවේ කැඳවුම්කරු අචාර්ය ගුණදාස අමරසේකර මහතා පැවසීය.

රාජගිරිය පිහිටි ජාතික සංවිධාන පොදු මධ්‍යස්ථානයේදී අද (12 )පැවති මාධ්‍ය හමුවකට එක්වෙමින් ඒ මහතා මේ බව කීය.

 
“පසුගිය කාලය තුළ මේ රජය යම් යම් පනත් සංශෝධනය කරගත් ආකාරය දැක්කම අපට හිතෙනවා ඒ විදියටම 20වන ආණ්ඩුක‍්‍රම සංශෝධනය සිදුකර ගනීද කියලා 19 සංශෝධනය කරගත් ආකාරයත් අපිට මතකයි. අතුරුදන් වුවන්ගේ කාර්යාල පනත සම්මත කරගත්තෙත් පාර්ලිමේන්තුවේ හරියාකාර විවාදයක් ලබාදීමෙන් තොරවයි.

20වන ආණ්ඩුක‍්‍රම ව්‍යවස්ථා සංශෝධනය මගින් පොලිස් බලතල,ඉඩම් බලතල ආදී ෆෙඩරල් රාජ්‍යයක තිබෙන බලතල පළාත් සභාවට ලබාදෙනවා. එමගින් කරන්නේ 13 වන ආණ්ඩුක‍්‍රම ව්‍යවස්ථාව සම්පූර්ණයෙන් බලාත්මක කිරීමයි.

ඔක්තෝම්බර් මාසය වනවිට  20 වන ව්‍යවස්ථා සංශෝධනය  සම්මත කරගැනීමට කටයුතු කරන බවක් පේන්න තියෙනවා. මෙච්චර කල් කළා වගේම ජනතාවගේ ඇස් වහලා  මේ දුර්වල විපක්ෂය ප‍්‍රයෝජනයට අරගෙන මේක පාස් කරන්න පුළුවන්. මේ වගේ සට කපට කම් කරලා 13 සම්පූර්ණයෙන් ක‍්‍රියාත්මක කිරීමේ ව්‍යවස්ථා යෝජනාව ඉදිරිපත් කරලා එය සම්මත කිරීමටයි මේ අර අදින්නේ “යැයි ඒ මහතා ප්‍රකාශ කරයි.