අනීෂා මානගේ
 
ඇතැම් සභාවල මේ වන විට ආප්ප න්‍යාය ක්‍රියාත්මක කර ඇතැයි හම්බන්තොට දිස්ත්‍රීක් පාර්ලිමේන්තු මන්ත්‍රී නාමල් රාජපක්ෂ මහතා පවසයි.
 
අගමැතිවාරයාගේ උපන්දින තෑග්ග ලෙස තෙල් මිල වැඩි කර ඇති බව ද රාජපක්ෂ මහතා කියයි.
 
නාමල් රාජපක්ෂ මහතා මෙසේ පැවසූවේ අද(26) සවස තංගල්ල කාල්ටන් නිවසේදී මාධ්‍ය වෙත අදහස් දක්වමිනි.
 
‘නගර සභාවේ බහුතර ඡන්දයත් අපි දිනලා. හැබැයි නගරාධිපති තෝරන්නේ ටොස්  එකෙන්. කාසියේ වාසියෙන් තමයි නගරාධිපති තෝරන්නේ.   ටොස්  එකෙන් අපි පැරදුණා. ජනතාවගේ බහුතර කැමැත්ත තියෙන්නේ පොදුජන පෙරමුණට. මේ යහපාලන ආණ්ඩුවෙන් අසීමිත ප්‍රජාතන්ත්‍රවාදය කියලා ලැයිස්තු ක්‍රමයක් හදුන්වල දුන්නනේ. සියයට හතලිහක් ලැයිස්තුවෙන් දෙනවා කිව්වා. අන්තිමට මොකද වුණේ,  එක සභාවක් වත් පිහිටුවාගන්න බැහැ. පිහිටගන්න පුළුවන් බහුතරයක් සභා දැන් ටොස්  වලින් පිහිටුවන්නේ. ස මහර සභා අපිට ආරංචියි දැන් ආප්ප න්‍යායත් ක්‍රියාත්මක කරලා. 
 
අද රටේ මිනීමැරුම් වැඩිවෙලා. අදත් උදේ මම දැක්කා ගෙදරකට වෙඩි තියලා.  ඇමැතිවරයකුගේ පුද්ගලික ලේකම්. මේ එක්සත් ජාතික පක්ෂයේ.   රාජපක්ෂලා හොරු,මිනීමරුවෝ කියල කෑ ගහපු අය  ගෙවල් වලට වෙඩි තියලා යනවා.  එදා කළා නම් කොහොමද? මේකට අහුවෙන්නේ ගෝඨාභය රාජපක්ෂ. හැප්පිලා මැරුණු තඩුජීන්වත් ඝාතනය කළා කිව්වනේ. එහෙම ආණ්ඩුවේ ඉන්න ඇමතිවරුන්ගේ ගෙවල් වලට ඇවිත් වෙඩි තියල යනවා. ආණ්ඩුවට හයියක් නැහැ මේ රටේ නීතිය හා සාමය ආරක්ෂා කරලා දෙන්න. ආණ්ඩුවේ ඉන්න මැති ඇමතිවරුන්ට හැකියාවක් නැහැ රටේ ජනතාවගේ ආරක්ෂාව තහවුරු කරන්න.  
 
රටේ අගමැතිතුමාගේ උපන්දින තෑග්ගට පෙට්‍රල් මිළ රුපියල් නවයකින් වැඩිකළා. අද පැහැදිලියි ආණ්ඩුවට ආර්ථිකය හසුරුවාගන්න බැහැ. ජනතාවගේ ආරක්ෂාව තහවුරු කර දෙන්න බැහැ. දැන් තව ටික දවසක් ගියාම අපේ ගම්වල ඉන්න අම්මලා තාත්තලා හැරමිටියෙන් ගහනවා ආණ්ඩුවේ ඉන්න ඇමතිවරුන්ට.  ‘ යැයි ද මන්ත්‍රීවරයා කීවේය.