(දයාරත්න ඇඹෝගම)
 
තර්ජනය කිරීම නිසා හෝ මහ පාරේ වැතිරීම නිසා හෝ රටේ ව්‍යවස්ථාව වෙනස් කිරීමටවත් ආණ්ඩුව වෙනස් කිරීමටවත් ඉඩ නොලැබෙන බව ශ්‍රී ලංකා නිදහස් පක්ෂ ජාතික සංවිධායක, වාරි මාර්ග ජල සම්පත් හා ආපදා කළමනාකරණ අමාත්‍යය දුමින්ද දිසානායක මහතා පැවසීය.

අමාත්‍යවරයා මේ බව පැවසුවේ අනුරාධපුර හොරොව්පතාන ශ්‍රී ලංකා නිදහස් පක්ෂ ආසන බල මණ්ඩල රැස්වීම අමතමිනි. හොරොව්පතාන ශ්‍රී ලංකා නිදහස් පක්ෂ ආසන සංවිධායක වීරකුමාර දිසානායක මහතා සංවිධානය කළ මෙම බල මණ්ඩල රැස්වීම කහටගස්දිගිලිය ප්‍රාදේශීය සභා ශ්‍රවණාගාරයේදී අද (28) පැවැත්විණි.

එහිදී අමාත්‍ය දුමින්ද දිසානායක මහතා මෙසේ පැවසීය.

‘විමල් වීරවංශ  මහතා ඇතුළු තවත් බොහෝ දෙනෙකු 5 වැනි දා කොළඹ වටලනවා. කියලා කථා කරනවා. වටලන්නේ කොහොමද කියලා මට හිතා ගන්න බෑ. විමල්ට කොළඹ වටලන්න බෑ.  වටලන්න එන්න හදන අයටත් මතක් කරන්නේ කොළඹ බලලා ගියාට කමක් නෑ. හැබැයි මේ රටේ දේශපාලනය ක්‍රියාත්මක වෙන්නේ ව්‍යවස්ථාවක් එක්ක. ජනාධිපතිවරයෙක්ට ඉන්න පුළුවන් අවුරුදු ගාණක් තියෙනවා. ඒක වෙනස් කරන්න උද්ඝෝෂණයකට හෝ පා ගමනකට බැහැ. ඒක වෙනස් කරන්න වෙන විදිහක් නෑ.
මෙම අවස්ථාවට හිටපු අමාත්‍ය පියසිරි විජේනායක, මධ්‍යම පළාත් සභා මන්ත්‍රී නිමල් ප්‍රේමවංශ, ජාතික නිදහස් පෙරමුණේ හිටපු මහ ලේකම් ප්‍රියන්ජිත් විතාරණ යන මහත්වරු ඇතුළු විශාල පිරිසක් සහභාගී වූහ.