(නිමල කොඩිතුවක්කු)

කාන්තාවන්ගේ කොන්ද බිඳ දමා විනාශ කළ පාලනයක් තුළ කාන්තා දිනය සැමරීමට සිදුව ඇතැයි පාර්ලිමේන්තු මන්ත්‍රිනී තලතා අතුකෝරළ මහත්මිය කොළඹදී පැවසුවාය.

රටේ ආරක්ෂාව තහවුරු කිරීමට පැමිණි ආණ්ඩුව ගැබිනි මාතාවගේ ත්‍රිපෝෂ එකේ සිට සියල්ල අහිමි කර ඇතැයිද මන්ත්‍රීවරිය සඳහන් කළාය.

කොළඹ මාක්ස් ප්‍රනාන්දු මාවතේ විපක්ෂ නායක කාර්යාලයේ පැවති මාධ්‍ය හමුවකට එක්වෙමින් තලතා අතුකෝරල මහත්මිය මෙසේද කීවාය.

"කාන්තා දිනය සමරන අවස්ථාවේ මේ රටේ කාන්තාවන්ට ජීවත්වීමේ අයිතිය, භාෂණයේ නිදහස, නැති කරලා. ව්‍යවස්ථාව තුළින් ප්‍රජාතන්ත්‍රවාදීව ජීවත්වීමට දීලා තියෙන අයිතීන් සියල්ල නැති කරලා. අද ජනාධිපතිවරයා ඇතුළු මේ ආණ්ඩුව ගෙනියන මහා ඒකාධිපති පාලනයට එරෙහිව තමයි කාන්තාවන් හැටියට අපිට පෙළ ගැහෙන්න සිදුවෙලා තියෙන්නේ.

ආර්ථිකය ගැන කතා කළත් ගෙදර බුදුන් අම්මා කියලා කතා කරත් කාන්තාවට තිබුණු හයිය අද කොන්ද කඩලා විනාශ කරලා. දරුවෙක් මේ ලෝකෙට බිහි කරන්න ඉන්න ගැබිනි මාතාවගේ ත්‍රීපෝෂ එකේ ඉදලා අවසානයේ තියෙන සියලු දේවල් රටේ ආරක්ෂාව තහවුරු කරන්නේ කියලා ආපු මේ ආණ්ඩුව නැති කරලා. කාන්තාවන්ගේ ඉඳලා ගැබිනි කාන්තාව දක්වා සියල්ලම අයිති නැති කරලා. 

අපේ හිටපු සහෝදර පාර්ලිමේන්තු මන්ත්‍රීනි හිරුණිකා ප්‍රේමචන්ද්‍ර මැතිනියට පසුගිය දවසක සිදුකළ මැරබලය චන්ඩි බලය ඒ මහා නින්දිත අපහාස කිරීම තුළ කාන්තාවන් හැටියට අපි ඉතාම කනගාටු වෙනවා.

මේ වගේ පීඩා වලට කාන්තාවක් ලක්වෙච්ච යුගයක් මීට කලින් ඇවිත් නැහැ. කිසිම දවසක දරුවෙකුට කිරි පිටි ටික නැති වුණේ නැහැ. ගැබිනි මව්වරුන්ට ත්‍රිපෝෂ නැති වුණේ නැහැ. ඒ වගේම අඩුම තරමේ ගෑස්, තෙල් පෝලිම් මීට පෙර තිබුණේ නැහැ. 

නීතිය හදන්න ආරක්ෂාව හදන්න ආපු ජනාධිපතිවරයා යටතේ අදහසක් ප්‍රකාශ කිරීමේ ශක්තියක් නැහැ. ඒ තත්ත්වයම තමයි අද පාර්ලිමේන්තුව ඇතිවෙලා තියෙන්නේ. සභාගර්භය පාලනය කිරීමක් නැහැ එවැනි චන්ඩි පිරිසට තනතුරු ලබා දීලා ඒ අය හරහා අපි ප්‍රජාතන්ත්‍රවාදීව නගන හඬ යටපත් කරන්න ක්‍රියාත්මක වෙනවා.