නාලක සංජීව දහනායක

රට පාලන කළ ඕනෑම ආණ්ඩුවකට එරෙහිව එතෙක් මෙතෙක් ඉදිවූ දැවැන්තම මිනිස් පවුර අද කොළඹ නගරයේදී ඉදිවන බව ඒකාබද්ධ විපක්‍ෂයේ ප්‍රධාන සංවිධායක පාර්ලිමේන්තු මන්ත්‍රී ඩලස් අලහප්පෙරුම මහතා අද (04) පැවසීය.

මෙම උද්ඝෝෂණය හේතුවෙන් සාමාන්‍ය ජනතාවට යම්  අපහසුතාවයක් සිදුවන්නේ නම් ඒ සම්බන්ධයෙන් තම කනගාටුව පළකරන බවද මන්ත්‍රීවරයා කීය.

පාර්ලිමේන්තු මන්ත්‍රී ඩලස් අලහප්පෙරුම මහතා මෙසේද පැවසීය.
 
‘1505 වසරේදී පෘතුගීසින් මෙරටට පැමිණි දින සිට මෛත්‍රීපාල සිරිසේන ජනාධිපතිවරයා දක්වා ගතවූ අවුරුදු 513 ක ඉතිහාසය තුළ අපේ රටේ නොයෙක් ආකාරයේ උද්ඝෝෂණ ඇති වුණා. නමුත් අපේ රටේ තිබූ ඕනෑම ආණ්ඩුවකට එරෙහිව කොළඹ නගරයේ ඉදිවන දැවැන්තම මිනිස් පවුර හෙට (5) අගනුවරදී ඉදිවෙනවා. මේ මිනිස් පවුර රට සුරකින මිනිස් පවුරයි. 

අපි සියලුම දෙනා මේ ආණ්ඩුව ගෙදර යැවිය යුතුය යන මතය දරනවා. ඒ සම්බන්ධයෙන් අපි අතර කිසිම මතභේදයක් නැහැ. ඒ නිසා  නිදහස් රටක්, නිදහස් ආර්ථිකයක් අපේක්‍ෂා කරන සියලුම දෙනා පක්‍ෂ භේදයෙන් තොරව මෙයට සහභාගි වෙනවා. මේ උද්ඝෝෂණය නිසා පුරවැසියන්ට යම් අපහසුතාවයක් සිදුවෙනවා නම් ඔවුන්ට අපි අපේ කනගාටුව පළ කරනවා.’

ඒකාබද්ධ විපක්‍ෂය බොරැල්ල, ආචාර්ය එන්.එම් පෙරේරා කේන්ද්‍රයේ දී අද (4) පැවැත්වූ මාධ්‍ය හමුවකට එක්වෙමින් මන්ත්‍රීවරයා මේ බව සඳහන් කළේය.