අනතුර තමන් ළඟ නොසිටි මොහොතේ ආසියාවේ ලංකාව වැනි රාජ්‍යයන්ට මානව හිමිකම් පිළිබඳ පාඩම් ඉගැන්වීමට ආ බටහිර ජාතීන් සර්පයා දෂ්ට කරන විට මානව හිමිකම් කඩකර හෝ ජාතික ආරක්ෂාව තහවුරු කිරීමට පසුබට නොවන බව කියමින් කතාව වෙනස් කර ඇතැයි හිටපු ජනාධිපති මහින්ද රාජපක්ෂ මහතා ඊයේ (22) පාකිස්තානයේදී පැවැසීය.

ලොව බිහිසුණුම ත‍්‍රස්තවාදීන් ලෙස එල්.ටී.ටී.ඊ.ය පරාජය කිරීමේදී හමුදා සතුව තිබූ දැඩි අධිෂ්ඨානය ගැන එවකට සිටි සේනාධි නායකයා ලෙස තමා ආඩම්බර වන බවත් ශ්‍රී ලංකාවේ ජනතාව ඒ වෙනුවෙන් කළ කැප කිරීම් සදා අගයන බවත් හිටපු ජනාධිපතිවරයා කීවේය.
හිටපු ජනාධිපතිවරයා මේ බව සඳහන් කළේ පාකිස්තානයේ පැවැති සාමය සඳහා වූ ශ්‍රී ලාංකික අරගලය සහ එහි පාඩම් මැයෙන් පැවැති සමුළුවේ ප‍්‍රධාන ආරාධිත දේශනය පවත්වමිනි.

පාකිස්තානයේ ආරක්ෂක අධ්‍යාපන සහ පර්යේෂණ ආයතනය විසින් සංවිධානය කරන ලද මෙම සමුළුව ඉස්ලාමාබාද්හි සෙරේනා හෝටලයේදී පැවැත්විණි.

යුද්ධය අවසන් කිරීමේදී පාකිස්ථානය, චීනය සහ ඉන්දියාව ප‍්‍රමුඛ රාජ්‍යයන් කළ මෙහෙවරද හිටපු ජනාධිපතිවරයාගේ ඇගැයීමට ලක්විය.
සභාවෙන් ඉදිරිපත්වූ ප‍්‍රශ්නවලට පිළිතුරු දුන් හිටපු ජනාධිපතිවරයා එවකට දිවි පරදුවට තබා දේශය රැුකගත් හමුදාවට ඩයස් පෝරාවේ සහ බටහිර බලපෑම් හමුවේ වර්තමාන පාලකයින් විසින් කරනු ලබන කෙනෙහිලිකම් පිළිකුලින් යුතුව බැහැර කරන බවද කීවේය.

ත‍්‍රස්තවාදියාට තේරෙන භාෂාවෙන් උත්තර දිය යුතුයි. හොඳ ත‍්‍රස්තවාදියා නරක ත‍්‍රස්තවාදියා කියා බෙදන්න එපා. ප‍්‍රජාතන්ත‍්‍රවාදයේ පරම සතුරා ත‍්‍රස්තවාදය බව මොහොතකට හෝ අමතක කරන්න එපා ...” යැයිද හිටපු ජනාධිපතිවරයා කීවේය.

මෙම සමුළුවට පාර්ලිමේන්තු මන්තී‍්‍රවරුන්වන විමල් වීරවංශ, ඩලස් අලහප්පෙරුම, හිටපු විදේශ අමාත්‍ය ජී. එල්. පීරිස් යන මහත්වරුද පසුගිය වසර තිහක කාලය තුළ ශ්‍රී ලංකාවේ පාකිස්තාන කොමසාරිස්වරුන් ලෙස සේවය කළ පිරිසක්ද එරට අමාත්‍යාංශ ලේකම්වරුන් ඉහළ හමුදා නිලධාරීහු විශ්වවිද්‍යාල කථිකාචාර්යවරු සහ මාධ්‍ය ආයතන ප‍්‍රධානීහුද සහභාගි වූහ.