‘අපිට නඩු දැම්මාට අපි කාටත් වෛර කරන්න නෑ’

 
(දයාරත්න ඇඹෝගම)
 
අපිට නඩු දැම්මට අපි කාටවත් වෛර කරන්නෙත් නැහැ. ඒත් ඒවා අමතක කරන්නෙත් නැහැ. අපට බොරු චෝදනා එල්ලපු කරපු, අපිට නඩු දාපු අය ගැන ජනතාව ඉදිරියේදී තීන්දු කරනු ඇතැයි බැසිල් රාජපක්ෂ මහතා අනුරාධපුරයේ දී පැවසීය.

ඒ මහතා මේ බව ප්‍රකාශ කළේ ශ්‍රී ලංකා පොදුජන පෙරමුණ විසින් පවත්වනු ලබන ‘පොදු ජන රළ’ සම්මන්ත්‍රණ මාලාවේ සාරම්භක උත්සවයේ දීය.

මෙම සම්මන්ත්‍රණය  අනුරාධපුර යොවුන් නිකේතනයේ  දී පැවැත්විණි.මෙහිදී තව දුරටත් අදහස් දැක්වු බැසිල් රාජපක්ෂ මහතා මෙසේ ද පැවසීය.

පොහොට්ටුව ලංකාවේ පළාත් පාලන කොට්ඨාස 4296 න් 3545 ජය ගැනීමට හැකිවුණා. අනුරාධපුර නැගෙනහිර කොට්ඨාශ 34 න් 33 ක් ජයගත්ත බවත් ආඩම්බරයෙන් කියනවා. එකක් පොඩි ප්‍රමාණයකින් පරාජයට පත්වුණා.

හිටපු ජනාධිපති මහින්ද රාජපක්ෂ මහතා මුල්වරට රට බාර ගන්න විට අවුරුදු 20 යුද්ධයකින් රට විනාශ වෙලා තිබුණේ. සුනාමියෙන් රට විනාශ වෙලා තිබුණේ.ඒ වාගේම නොයෙක් නොයෙක් ආකාරයට විනාශ කරපු රටක් තමයි එතුමා බාර ගත්තේ.

එදා සුනාමියෙන් සහ යුද්ධයෙන් රට විනාශ වුනාට වඩා මේ අවුරැදු තුන හමාර තුලදි රට සම්පුර්ණයෙන්ම විනාශ වුනා.අපි සහතික වෙනවා මහින්ද රාජපක්ෂ මහතා එදා යුද්ධය නිම කරලා සාමය ගේනාවා වාගේම සුනාමියෙන් විනාශ වුන රට යුද්ධයෙන් විනාශ වුණ රට ප්‍රතිපත්ති වලින් විනාශ කරපු රට වඩා වේගයෙන් නැවත පොහොට්ටුවේ රජයක් යටතේ මහින්ද රාජපක්ෂ මහතාගේ නායකත්වයෙන් යළිත් ගොඩ නගනවා කියලා පොරොන්දු වෙනවා.

උතුරැ මැද පළාතේ ජනතාව ගැන ලොකු කැක්කුමක් මහින්ද රාජපක්ෂ මහතාට තිබෙනවා.එදා කොටි ත්‍රස්තවාදින් විසින් කැබිතිගොල්ලැව ජනතාව ඝාතනය කළ අවස්ථාවේ ආරක්ෂක නිලධාරින් එපා කියද්දී කැබිතිගොල්ලෑවට පැමිණ ජනතාවගේ දුක සැප විමසා බැලුවා. එතුමා මොන වැඩක් ආරම්භ කළත් ඒ දේ කලේ අනුරාධපුරය මුල් කරගෙන. අපි එකයි මේ සම්මන්ත්‍රණ මාලාවත් අනුරාධපුරයෙන් පටන් ගත්තේ.

මෙම අවස්ථාවට උතුරුමැද හිටපු මහ ඇමැති රංජිත් සමරකෝන්,ගම්පහ දිස්ත්‍රික් පාර්ලිමේන්තු මන්ත්‍රී ප්‍රසන්න රණතුංග, උතුරුමැද පළාත් සභාවේ හිටපු මැති ඇමැතිවරු නගර සභා සහ ප්‍රාදේශීය සභා සභාපතිවරු,මන්ත්‍රීවරු ඇතුළු විශාල පිරිසක් එක්ව සිටියහ.