අද උද්ඝෝෂණ අයිතියත් නෑ: ඡන්ද අයිතියත් නෑ

(සිටිනාමළුව-අනීෂා මානගේ, තංගල්ල-ආරියදාස කොඩිතුවක්කු, රන්න-චන්ද්‍රසේන ගමගේ)

උද්ඝෝෂණය කිරීමට තිබෙන අයිතිය මෙන්ම ජනතාවගේ ඡන්ද අයිතියද ආණ්ඩුව උදුරාගෙන ඇතැයි හිටපු ජනාධිපති මහින්ද රාජපක්ෂ මහතා පෙරේදා (21) තංගල්ලේදී පැවැසීය.

හිටපු ජනාධිපතිවරයා මේ බව සඳහන් කළේ බන්ධනාගාරගතව සිටින පාර්ලිමේන්තු මන්ත්‍රීවරුන් ඇතුළු පිරිසකගේ සුවදුක් බැලීමට පෙරේදා තංගල්ල බන්ධනාගාරයට ගිය අවස්ථාවේදීය.
හිටපු ජනාධිපතිවරයා මෙසේද කීවේය.

රිමාන්ඞ් සිර භාරයේ ඉන්න කොඩිකාර මහත්තයා, නීතිඥතුමා, අජිත් ඇතුළු සියලු දෙනාම බැලුවා. අලුත් බන්ධනාගාරයක් හදලත් තාම වැස්සට තෙමෙන අබලන් වෙච්ච හිරගෙදර මේ අය තියාගෙන ඉන්නවා. මේක විවෘත කරලා තාම මේ අය යවලා නැහැ. අසාධාරණයි. මෙච්චර එකක් තියාගෙන මොකටද මේ අය යවන්නේ නැතුව ඉන්නේ කියන එක මට තේරෙන්නේ නැහැ. වහාම මුලින්ම කරන්න තියෙන්නේ මේ හිරගෙදර මාරු කරන එක. මොකද එක පැත්තකින් මේක මහ වදයක් ඒ ඇතුළේ ඉන්න අයට.

හම්බන්තොට සිද්ධිය සම්බන්ධයෙන් ආණ්ඩුවේ හැසිරීමට අපි මුහුණ දෙනවා. අපි මීට ඉස්සරවෙලා ඊට වඩා උදවියගේ ඒවට මුහුණ දුන්නනේ. හැබැයි කවදාවත් ප්‍රේමදාස මහත්තයා ජේ.ආර්. ජයවර්ධන මහත්තයා මන්ත්‍රීවරු හිරේ දැම්මේ නැහැ. මම පාද යාත්‍රා, ජනඝෝෂා, මිනිස් දම්වැල්, උද්ඝෝෂණ කීයක් කළාද? වාසුදේව නානායක්කාර කොච්චර කළාද? ඉතින් අපි ඒවා සංවිධානය කරලා එළියට බැහැලා, රාජ්‍ය දේපළ විකුණනවට විරුද්ධව කථා කළා. ඒවට ඉඩ දීලා තිබුණ මන්ත්‍රීවරුන්ට.

නමුත් අද ඒ අයිතියත් උදුරගෙන. ඡන්ද අයිතිය උදුරගෙන. ඡන්දයක් නැහැ. ජනතාවගේ ඡන්ද බලය උදුරගෙන තියෙනවා. උද්ඝෝෂණය කරන්න තියෙන අයිතිය. මෙතන ගල් ගැහුවේ කව්ද කියන එක හොඳටම පැහැදිලි නේ. තට්ටු දෙකේ ගෙදරක ඉඳලා කරපු වැඬේ ඔක්කොම දැකල තියෙනවා. ඒවායේ වීඩියෝ දර්ශන අරන් නේ ඉන්නේ. සම්පූර්ණයෙන් මේක දේශපාලන වුවමනාවට කරපු අනවශ්‍ය වැඩපිළිවෙළක් යැයිද හිටපු ජනාධිපතිවරයා සඳහන් කළේය.