(*** අංජුල මහික වීරරත්න)

ප්‍රජාතන්ත්‍රවාදයට මරු පහරක්වූ විසිවැනි ආණ්ඩුක්‍රම ව්‍යවස්ථා සංශෝධනය වෙනුවට දහ නව වැනි ආණ්ඩු ක්‍රම ව්‍යවස්ථා සංශෝධනයෙන් ඔබ්බට ගිය වැඩපිළිවෙළ ක්‍රියාත්මක කිරීමට බලාපොරොත්තු වන බව විපක්ෂ නායක සජිත් ප්‍රේමදාස මහතා කොළොන්නාවේදී පැවැසීය.

දහ නව වැනි ආණ්ඩුක්‍රම ව්‍යවස්ථා සංශෝධනයෙන් බිහිවූ ආයතන  වචනයේ පරිසමාප්ත අර්ථයෙන්ම ස්වාධීන ආයතන බවට පත්කර විධායකය-ව්‍යවස්ථාදායකය සහ අධිකරණය එකිනෙකා ආරක්ෂා කරගෙන පාලනය මෙහයවීමේ ක්‍රමවේදය සකස් කරනවැයිද සජිත් ප්‍රේමදාස මහතා සඳහන් කළේය.

විපක්ෂ නායක සජිත් ප්‍රේමදාස මහතා කොළොන්නාව පුරාණ විහාරස්ථානය වැඳපුදා ගෙන මහා සංඝ රත්නයේ ආශීර්වාදය ගැනීමෙන් අනතුරුව මාධ්‍ය හමුවේ ප්‍රකාශය කරමින් මේ බව සඳහන් කළේය.

වැඩිදුරටත් අදහස් දැක්වූ සජිත් ප්‍රේමදාස මහතා මෙසේ ද කීවේය.

සමගි ජනබලවේගයේ අප බෞද්ධ සිද්ධස්ථාන පුනරුදය කිරීමේ ගමන ක්‍රියාත්මක කරනවා. කොළොන්නාව ශාසනාරක්ෂක බල මණ්ඩල කොට්ඨාසයෙහි විහාරස්ථාන ගණනාවකට අද දිනයේ පැමිණියේ ඒ අනුවයි.

මහා සංඝරත්නයේ අවවාද-අනුශාසනා ගෙන බුද්ධ ශාසනයේ චිරස්ථිතිය සඳහා විහාරස්ථාන පද්ධතිය ශක්තිමත් කිරීම අපගේ අරමුණයි.
විසි වැනි ආණ්ඩුක්‍රම ව්‍යවස්ථා සංශෝධනය රටේ ප්‍රජාතන්ත්‍රවාදයට එල්ලවූ මරු පහරබව කිව යුතුයි. මෙම යෝජනාවට පාර්ලිමේන්තුවේ දී විරුද්ධ වනවා සේම සම්ප්‍රදායෙන් පිටට පැන දහ නවවැනි සංශෝධනය තවත් ඉදිරියට ක්‍රියාත්මක කිරීමේ වැඩ පිළිවෙළ ක්‍රියාත්මක කිරිමට අප බලාපොරොත්තු වෙනවා. එමගින් රටේ ජාතික ආරක්ෂාව ශක්තිමත් කිරීම සඳහා ජාතික ආරක්ෂක සභාව ආණ්ඩුක්‍රම ව්‍යවස්ථාවෙන්ම ස්ථාපිත කිරීමේ වැඩපිළිවෙළ දහ නවයෙන් ඉදිරියට වැඩපිළිවෙළ යටතේ ක්‍රියාත්මක කිරීමට බලාපොරොත්තු වෙනවා.

යහපත් රාජ්‍ය පාලනය සඳහා නිර්මාණයවූ දහ නව වැනි ආණ්ඩුක්‍රම ව්‍යවස්ථා සංශෝධනයේ ප්‍රතිපාදනවලින් බිහිවූ ආයතන, වචනයේ පරිසමාප්ත අර්ථයෙන්ම ස්වාධීන ආයතන බවට ස්ථාපිත කිරීම අපගේ අරමුණයි. ඒ ආයතනවලට දේශපාලන හෝ වෙන යම් බලපෑම් කිරීමට ඉඩ ප්‍රස්ථා හෝ දෙන්නේ නැතිව ඒ ආයතනවල ස්වාධීන බව සහ ශක්ති සම්පන්න බව තහවුරු කිරීම අපගේ අරමුණයි.

එමෙන්ම යහපත් රාජ්‍ය පාලනය සඳහා බිහි වූ ආයතනවලට ප්‍රමාණවත් ප්‍රතිපාදන දිය යුතුයි. භෞතික මෙන්ම මානව සම්පත්ද දියයුතුයි. දහ නව වැනි ව්‍යවස්ථාවේ තිබෙන දුර්වලතා ඉවත් කර වඩා ප්‍රශස්ත සංශෝධනය ක්‍රියාත්මක කරන්නට අප බලාපොරොත්තු වෙනවා.

මෙම වැඩ පිළිවෙළ අනුව විධායකය, ව්‍යවස්ථාදායකය එමෙන්ම අධිකරණය තම-තමන්ට හිමිවන බලය තුළින් යහපත් පාලනයට තුඩු දෙන ආකාරයෙන් කටයුතු කිරීම සහ ඒ ඒ ආයතන වලින් එකිනෙකා ආරක්ෂා කිරීමේ මෙන්ම සුරක්ෂිත කිරීමේ ක්‍රමවේදය ක්‍රියාත්මක කරනවා. ඒ අනුව නැවුම් වැඩපිළිවෙළ ඔස්සේ දහනවයෙන් ඔබ්බට යන වැඩසටහන ක්‍රියාත්මක කරන්න බලාපොරොත්තු වෙනවා යැයිද විපක්ෂනායක සජිත් ප්‍රේමදාස මහතා වැඩිදුරටත් පැවැසීය.