(*** යක්කලමුල්ල ජේ.කේ.එල්. චාමින්ද)

‘එජාප නායකත්වය සඳහා හිටපු අමාත්‍ය වජිර අබේවර්ධන මහතා පත්කළ යුතු බවට ගාල්ල මහ නගර සභාව නියෝජනය කරන එජාප නාගරික මන්ත්‍රීවරුන් 14 දෙනාම ඉල්ලා සිටින බව, ගාල්ල මහ නගර සභාවේ නියෝජ්‍ය නගරාධිපති පවුසල් නියාස් මහතා පැවැසීය.

ගාල්ලේ  පැවති මාධ්‍ය හමුවේදී නියෝජ්‍ය නගරාධිපතිවරයා මේ බව සඳහන් කළේය.

එජාප නාගරික මන්ත්‍රීවරුන්ගේ  සහභාගිත්වයෙන් පැවති මාධ්‍ය හමුවේදී නියෝජ්‍ය නගරාධිපතිවරයා මෙසේද කීවේය.

 ‘එජාප නායකත්වයට නියම සුදුස්සා වජිර අබේවර්ධන මහතායි. ගාල්ල දිස්ත්‍රික්කයේ පමණක් නොව වෙනත් දිස්ත්‍රික්කවල  එජාප පාක්ෂකයින් ඉලන්නේ වජිර අබේවර්ධන මහතා එජාප නායකත්වයට පත් කළ යුතුයි කියලයි. පසුගිය පාර්ලිමේන්තු මැතිවරණයේ ප්‍රතිඵල අධ්‍යයනය කිරීමේදී  එජාපයට ලැබුණු ඡන්දවලින් වැඩිම ඡන්ද ප්‍රතිශතය ගෙන තිබෙන්නේ ගාල්ල දිස්ත්‍රික්කයෙනුයි. ඒ සඳහා විශේෂ හේතුව වජිර අබේවර්ධන හිටපු ඇමැතිතුමාගේ සංවිධාන ශක්තිය හා නායක්තවයයි.

පක්ෂය ශක්තිමත්ව ඉදිරියට ගෙන යන්න පුළුවන් නායකයා වජිර අබේවර්ධන මහත්තයායි. ඔහු කවදාවත් පක්ෂය අත්හැර ගියේ නැහැ. නායක්තවය  අපේක්ෂා කරන කණ්ඩායම තුළ වජිර අබේවර්ධන ඉදිරියෙන් ඉන්නවා. ගාල්ල මහ නගර සභාවේ  එජාප නාගරික මන්ත්‍රීවරුන් 14 දෙනා එක හඬින් කියන්නේ එජාප නව නායක ලෙස වජිර අබේවර්ධන මහතා තොරා ගන්න කියලයි.

ගාල්ල මහ නගර සභාවේ විපක්ෂනායක ජිලිත් නිශාන්ත මහතා  (එජාප) මාධ්‍ය හමුවේ දී අදහස් දක්වමින් මෙසේ කීවේය.

 ‘වජිර අබේවර්ධන හිටපු ඇමතිතුමා පළපුරුදු දක්ෂ දේශපාලනඥයෙකි. ඔහුට එජාප නායකත්වය දුනහොත් දැනට වැටී ඇති එජාපය ගොඩගන්න පුළුවනි. එජාපය ශක්තිමක් කරන්න පුළුවනි. 77 දී ජේ.ආර්. ජයවර්ධන මහතා ඇතිකළ වෙනස කරන්න පුළුවන් වජිර අබේවර්ධන මහතාට පමණයි. ඒ නිසා එජාපය ගොඩගන්න,  එජාපයේ නායකත්වය වජිර අබේවර්ධන මහතාට දෙන්න කියා අප නායකතුමාගෙන් ඉල්ලා සිටිනවා.

 ගාල්ල මහ නගර සභාවේ නාගරික එජාප මන්ත්‍රීනි එංගල් පියදාස මහත්මිය මෙසේ කීවාය.

 ‘වජිර අබේවර්ධන මහතාගේ වසර 38ක දේශපාලන ඉතිහාසය තුළ ඔහු කවදාවත් එජාපය හැර දමා ගියේ නැහැ.  අනෙකුත් එජාප සංවිධායකවරුන් හා මන්ත්‍රීවරුන් පක්ෂය හැර දමා ගිය අවස්ථාවලදී ගාල්ල දිස්ත්‍රික්කයේ පක්ෂයේ බර කරට ගෙන කටයුතු කළා. වජිර අබේවර්ධනට හොඳ නායකත්වයක් තිබෙනවා. එජාප ජාතික ලැයිස්තු මන්ත්‍රී ධුරයත් වජිර අබේවර්ධන මහතාට දිය යුතුයි.
 ගාල්ල මහනගර සභාවේ එජාප නාගරික මන්ත්‍රීනි චාන්දනි ගුණසේකර  මහත්මිය මෙසේ කීවාය.

 වජිර අබේවර්ධන මහතා එජාප පක්ෂයට ළැදිව සියලු‍ම නායකයින්ට ආදරයෙන් කටයුතු කළා. මේ අවස්ථාවේ නායකත්වයට  සුදුසුම පුද්ගලයා වජිර අබේවර්ධන මහතායි. වජිර අබේවර්ධන මහතා එජාප නායකත්වයට පත්කරන ලෙස එජාප කෘත්‍යාධිකාරී මණ්ඩලයෙන් ඉල්ලා සිටිනවා. වැටී ඇති පක්ෂය ගොඩගන්න පුළුවන් විශ්වකර්ම පුද්ගලයකු හැටියට වජිර අබේවර්ධන මහතා හඳුන්වා දෙන්න පුළුවනි.
 ගාල්ල මහ නගර සභාවේ  එජාප නාගරික මන්ත්‍රී කපිල කොහොඹන්ගේ මහතා මෙසේ කීවේය.

 ‘වජිර අබේවර්ධන දක්ෂ නායකයෙක්. එජාපය දැවැන්ත විදියට සංවිධානය කිරීමට අබේවර්ධන මහතාට ලොකු ශක්තියක් තිබෙනවා.

මාධ්‍ය හමුවට ගාල්ල මහ නගර සභාවේ එජාප නාගරික මන්ත්‍රීවරුන් වන පයාස් ලතිප්, ජයවීර පීරිස්, රෝෂාන් මවුසුප්, මොහොමඩ් සිරාජ්, කමල් හුසේන යන මහත්වරුද එක්ව සිටියහ.