(*** අම්බලන්ගොඩ හේමන්ත ද සිල්වා)

ගාල්ල දිස්ත්‍රික්කය ඩීල් හා මගඩි දේශපාලනයට හොර ගිවිසුම් දේශපාලනයට ප්‍රසිද්ධ බවත්, ඩීල්, කොමිස් වලින් හත්මුතු පරම්පරාවට පමණක් නොව මතු පරපුරටම කෝටි ප්‍රකෝටි ගණනක් ගත් බවත් සමගි ජනබලවේගය නායක හිටපු විපක්ෂනායක සජිත් ප්‍රේමදාස මහතා බලපිටියේ දී පැවසීය.

ඩීල් දේශපාලනයට සම්බන්ධ නොවූවන් හිරගෙදර බවත් කී සජිත් ප්‍රේමදාස මහතා තවත් සමහරුන් මහජන දේපළ අමු අමුවේ මහ දහවල් කොල්ල කා අධිසුඛෝපභෝගී ජීවිත ගත කරමින් රෑට හොඳින් නිදා ගන්නා බව ද, සජිත් ප්‍රේමදාස මහතා වැඩිදුරටත් සඳහන් කළේය.

කසළ ඩීල් දේශපාලනය නිසා​ ලොකු ලොක්කන් හොඳටම හම්බ කරගත් බව කී ප්‍රේමදාස මහතා මේ අය මිනිසුන් ගැන සලකන්නේ මුදලට කප්පමට රුපියල් දෙතුන්දාහකට ගන්න පුළුවන් අය ලෙස ආත්ම ගෞරවය පහළට දමලා යැයිද අවධාරණය කළේය.

ඉදිරි මහ මැතිවරණයට සමගි ජන බලවේගයෙන් තරග වදින බලපිටිය සංවිධායක නීතිඥ කමල් ජයන්ත ද සොයිසා මහතා ඇතුළු අපේක්ෂකයන් වෙනුවෙන් බලපිටිය නගරයේදී පැවැති ප්‍රචාරක රැස්වීමක් අමතමින් සජිත් ප්‍රේමදාස මහතා එසේ ප්‍රකාශ කළේය.

සමගි ජනබලවේගයේ ගාල්ල දිස්ත්‍රික් නායක හිටපු ඇමැති ගයන්ත කරුණාතිලක මහතා ඇතුළු ගාල්ල දිස්ත්‍රික්කයේ පාර්ලිමේන්තු මැතිවරණ අපේක්ෂකයන් ඇතුළු ක්‍රියාකාරීන් පිරිසගේ සහභාගිත්වයෙන් පැවැති ප්‍රචාරක රැස්වීම අමතමින් සජිත් ප්‍රේමදාස මහතා මෙසේද පැවසීය.

සමගි ජනබලවේගය බලපිටියේ නායකත්වයට උගත් ප්‍රබුද්ධ තරුණ නායකයකු වූ නීතිඥ කමල් සොයිසා මහතා පත් කිරීමට ලැබීම ඉමහත් ශක්තියක්. අද බලපිටිය සංවර්ධන පදනම ආරම්භ කර එහි සභාපති තනතුරට කමල් සොයිසා මහතා නම් කළා. බලය තිබුණත් නැතත් එයින් බලපිටියට උපරිම සේවාවක් කරනවා.

එළැඹෙන මහා මැතිවරණයේ දී ජනතාවගේ අදහස අගෝස්තු 05 වැනිදාට දුරකතනයේ ජයග්‍රහණය සමග පෙනේවි.
අද මා බලපිටියේදී කතා කරන්නේ රටට කොඩි විනයක්වී ඇති රහසිගත දේශපාලනය ගැනයි.

රහසිගත දේශපාලනය නිසා මාත් අපහසුතාවට පත් පුද්ගලයෙක් වනවා. ජනාධිපතිවරණයේදී අපට තිබුණේ දින 30-31ක වගේ කෙටි කාලයක්. අඩුම ගාණනේ දින 60ක් මැතිවරණ ව්‍යාපාරය කරන්න තිබුණා නම් අප ඉතා ඉහළ තත්ත්වයකට පත්වනු නොඅනුමානයි.

ගාල්ල දිස්ත්‍රික්කය ඩීල් දේශපාලනයට මගඩි දේශපාලනයට ප්‍රසිද්ධයි. හොර ගිවිසුම්වලට ප්‍රසිද්ධයි. මෙයින් කෝටි ප්‍රකෝටි ගණන් හම්බ කර ගත්තා. හත්මුතු පරම්පරාවට නොව මතු පරම්පරාවට මුදල් උපයා ගත්තා.

මෙසේ උපයාගත් අපිරිසිදු මුදල් වලින් කොටසක් උපයෝගී කරගෙන එක් මන්ත්‍රීවරයකු සත්තෝෂම් බෙදනවා.
 
අපේ මහා මැතිවරණ ජයග්‍රහණය සමග පළාත් සභා මැතිවරණය එනවා. පළාත් සභා මන්ත්‍රීකම තව අවුරුද්දයි. හැමෝටම ජනතාව අතරට යන්න වෙනවා. ඉදිරියේදී කොටන් අදින අය දිනවන්න මම බලපිටියට එනවා.

කසළ ඩීල් දේශපාලනය නිසා ලොකු ලොක්කන් හොඳටම හම්බ කර ගත්තා. ඔවුන් දැන් මිනිසුන් සලකන්නේ රුපියල් දෙතුන් දහසකට මුදලට කප්පමට ගන්න පුළුවන් අය ලෙසයි. ඒ තරමට පහළට දාලා.

සමගි ජනබලවේගයේ කිසිවකු ඩීල් දේශපාලනයට සම්බන්ධ නැහැ. ඩීල් දේශපාලනයට සම්බන්ධ නොවුණ උදවිය අද හිරගෙදරයි. අනිත් අය මහජන දේපළ අමු අමුවේ මහ දවල් කොල්ල කෑ මූල්‍ය ආයතන හොරකම් කරලා අධිසුඛෝපභෝගී ජීවිත ගත කරමින් රෑට හොඳට නිදා ගන්නවා.

මේ අය කොච්චර හොඳින් නිදා ගත්තත් ජනතාවගේ බදු මුදල්, ජනතාවගේ දේපළ බියක් සැකක් නැතිව කොල්ලකෑව බව බය නැතිව කියනවා. මෙම හොර මගඩි දේශපාලනයට අපි සම්බන්ධ නැහැ.

හිටපු ඇමැති හා ගාල්ල දිස්ත්‍රික් මැතිවරණ ධුර අපේක්ෂක ගයන්ත කරුණාතිලක මහතා ද, පියසේන ගමගේ, බන්දුලලාල් බණ්ඩාරිගොඩ, ජයන්ත ජයවීර, කමල් ජයන්ත ද සොයිසා, ආර්. පුෂ්පකුමාර ද සොයිසා යන මහත්වරුන් මෙහිදී කතා කළ අතර මනූෂ නානායක්කාර, තාරක නානායක්කාර, විජේපාල හෙට්ටිආරච්චි යන මහත්වරු ඇතුළු පිරිසක් සහභාගි වූහ.