(නාලක සංජීව දහනායක)

ජනාධිපතිවරණය පැවැත්වීමට පෙර ඉදිරි දින 90 කාලය ඇතුළතදී රාජ්‍ය ආයතන විකුණාදමා, ෆෙඩරල් ව්‍යවස්ථාව සම්මත කර රට විදේශීකරණය කිරීම වේගවත් කර තිබෙන බව මහනුවර දිස්ත‍්‍රික් පාර්ලිමේන්තු මන්ත‍්‍රී මහින්දානන්ද අලුත්ගමගේ මන්ත‍්‍රීවරයා අද (3) පැවැසීය.

එබැවින් ඉදිරි දින 90 කාලය තුළ ආණ්ඩුවේ වැඩපිළිවෙළ සම්බන්ධයෙන් ජනතාව දැඩි අවධානයකින් පසුවිය යුතු යැයි ද මන්ත‍්‍රීවරයා කීය.

එහිදී මන්ත‍්‍රීවරයා වැඩිදුරටත් මෙසේද පැවැසීය.

මත්කුඩු ජාවාරම්කරුවන්ගෙන් මරණ තර්ජන එල්ලවී තිබෙන බවට බුද්ධි අංශ විසින් ජනාධිපතිවරයාට දැනුම්දී ඇත්නම් ඒ සියලුම තොරතුරු ජනාධිපතිවරයා විසින් වහාම රටට හෙළි කළ යුතු බව අලුත්ගමගේ මන්ත‍්‍රීවරයා කීය.

මේ වනවිට ජනාධිපතිවරයා හා අගමැතිවරයා බරපතළ ලෙස ගැටුම් ඇතිව තිබෙන බව කී මන්ත‍්‍රීවරයා ශ්‍රී ලංකා නිදහස් පක්‍ෂය හා එක්සත් ජාතික පක්‍ෂය මධ්‍ය හමු පවත්වමින් එකිනෙකාව විවේචනය කරමින් සිටින බවද කීය.

මරණීය දඬුවම ක‍්‍රියාත්මක කිරීමට ජනාධිපතිවරයා විසින් ගෙන ඇති තීරණ සම්බන්ධයෙන් විපක්‍ෂය කුමක් කීවද අගමැතිවරයා එයට විරුද්ධවීම ප‍්‍රශ්නයක් යැයි කී අලුත්ගමගේ මන්ත‍්‍රීවරයා එවැනි තත්ත්වයක් යටතේ ජනාධිපති ඝාතන කුමන්ත‍්‍රණයක් පිළිබදව බුද්ධි අංශ විසින් අනාවරණය කර ඇත්නම් එය ඉතාම භයානක තත්ත්වයක් යැයි ද මහින්දානන්ද අලුත්ගමගේ මන්ත‍්‍රීවරයා සදහන් කළේය.

කොළඹ -07, ශ්‍රීමත් මාකස් ප‍්‍රනාන්දු මාවතේ පිහිටි විපක්‍ෂනායක කාර්යාලයේදී අද (3) පැවැති මාධ්‍ය හමුවකට එක්වෙමින් මන්ත‍්‍රීවරයා මේ බව සඳහන් කළේය.