(විමුක්ති එස් රුද්‍රිගු)

මෙරට විශාලතම සෘජු විදෙස් ආයෝජන ව්‍යාපෘතිය වූ ඇමෙරිකානු ඩොලර් බිලියන 3.7ක සිනොපෙක් තෙල් පිරිපහදු ව්‍යාපෘතිය සම්බන්ධයෙන් ශ්‍රී ලංකාවට සහ සිනොපෙක් සමාගමට පසුගිය ජූනි මාසය අවසන් වනවිටත් එකඟතාවයකට එළැඹීමට නොහැකි වී ඇතැයි ඇමෙරිකානු රාජ්‍ය දෙපාර්තමේන්තුව නිකුත් කළ මෙරට ආයෝජන තත්වය පිළිබඳව නවතම වාර්තාවේ සඳහන් වේ.

පසුගිය වසරේ ජනවාරි මාසෙදි සිනොපෙක් තෙල් පිරිපහදු ව්‍යාපෘති ගිවිසුම අවසන් කිරීමට කැපවන බව ජනාධිපති අනුර කුමාර දිසානායක මහතා ප්‍රකාශ කළ බවද එම වාර්තාවේ දැක්වේ. එය හම්බන්තොට වරාය ආසන්නයේ ඉදිකිරීමට තිබූ බවද ඇමෙරිකානු රාජ්‍ය දෙපාර්තමේන්තුව ප්‍රකාශ කළේය.

එසේම පසුගිය පෙබරවාරි මාසයේදී අදානි ග්‍රීන් එනර්ජි සමාගම මෙරට ඇමෙරිකානු ඩොලර් මිලියන 400 ක වටිනාකමකින් යුත් පුනර්ජනනිය බලශක්ති ව්‍යාපෘතියකින් ඉවත් වූ බවද එම වාර්තා වේ සඳහන් වේ. එහිදී රජය මුල් ගිවිසුමේ කොන්දේසි නැවත වරක් සාකච්ඡා කිරීමට උත්සාහ කිරීම ව්‍යාපෘතියෙන් ඉවත්වීමට හේතු ලෙස පෙන්වාදී තිබූ බවද එහි දැක්වේ.

ශ්‍රී ලංකාවේ නව පාවෙන එල්.එන්.ජී පර්යන්තයක් සඳහා ගිවිසුම අත්සන් කිරීමට දින කීපයකට පෙර ඒ පිළිබඳව චයිනා හාබර් ඉංජිනේරු සමාගම සමඟ පැවති සාකච්ඡා රජය නිහඬවම අවසන් කිරීමට පසුගිය දෙසැම්බර් මාසයේදී කටයුතු කළ බව ඇමෙරිකානු රාජ්‍ය දෙපාර්තමේන්තුව එම වාර්තාව නිකුත් කරමින් ප්‍රකාශ කළේය. එසේම රජය පාඩුලබන රාජ්‍ය ව්‍යවසායන් පුද්ගලීකරණය කිරීමේ සැලසුමද අත්හැර දැමූ බවත් ඒ වෙනුවට එම රාජ්‍ය ව්‍යවසායන් ලාබ ලබන ඒවා බවට පත් කිරීමට ප්‍රතිසංස්කරණ හඳුන්වා දුන් බවත් එහි සඳහන් වේ.

රජය ලබාදෙන මෙම එකිනෙකට වෙනස් පණිවුඩ සම්බන්ධයෙන් ඇතැම් ආයෝජකයන් කණස්සල්ල පළකර තිබෙන බවද එම වාර්තාවේ දැක්වේ. රජය විදේශීය ආයෝජන ආකර්ෂණය කර ගැනීමට උත්සාහ කරන අතරතුර, ඇතැම් ජ්‍යෙෂ්ඨ නිලධාරීන් රාජ්‍ය ව්‍යවසායන් හා ආර්ථික කටයුතුවල රාජ්‍ය සහභාගීත්වය වැඩි කළ යුතු බවට ප්‍රසිද්ධියේ කර ඇති ප්‍රකාශ අතර පවතින වෙනස සම්බන්ධයෙන්ද ඇතැම් ආයෝජකයන් අවධානය යොමුකර ඇති බව ඇමෙරිකානු රාජ්‍ය දෙපාර්තමේන්තුව නිකුත් කළ එම වාර්තාවේ සඳහන් වේ.

ශ්‍රී ලංකාවේ සෘජු විදෙස් ආයෝජනයක් සිදු කිරීමට යාමේදී තිබෙන දීර්ඝ අනුමත කිරීමේ ක්‍රියාවලිය ආයෝජකයන් කලකිරීමට පත්කරන බව ඇමෙරිකානු රාජ්‍ය දෙපාර්තමේන්තුව මෙරට ආයෝජන තත්වය පිළිබඳව නවතම වාර්තාවක් නිකුත් කරමින් ප්‍රකාශ කළේය.