(රෝෂන් තුෂාර)

 අරගල කරුවන් විසින්  2022 දී ගිනිබත්  කර විනාශයට පත් කළ කිරිඉබ්බන්වැව , මහවැලි අධිකාරියට අයත් ඉඩමේ දේපළ සඳහා   රජයේ නිලධාරීන්ට බලපෑම් කර වන්දි ලබා ගත්තේ යැයි කියන හිටපු රාජ්‍ය අමාත්‍ය ශෂීන්ද්‍ර රාජපක්ෂ සැකකරුට ආධාර අනුබල දීම සම්බන්ධයෙන් අත්අඩංගුවට ගෙන අධිකරණයට ඉදිරිපත් කළ  අධිකරණ හා ජාතික ඒකාබද්ධතා අමාත්‍යාංශයේ අතිරේක ලේකම්වරිය ඇපමත මුදා හැරීමට  කොළඹ ප්‍රධාන මහේස්ත්‍රාත් අසංග එස් බෝදරගම  මහතා අද (08) නියෝග කළේය.

 ජාතික හානි පූර්ණ කාර්යාලයේ හිටපු අධ්‍යක්ෂ ජනරාල් හා අධිකරණ හා ජාතික ඒකාබද්ධතා අමාත්‍යාංශයේ අතිරේක(පාලන) ලේකම් රාජපක්ෂ පතිරගේ සේපාලිකා සමන් කුමාරි නමැති සැකකාරියට රුපියල් ලක්ෂ දහය බැගින් වූ ශරීර ඇප දෙකක්‌ නියම කළ මහේස්ත්‍රාත්වරයා සැකකාරියට හානි පූර්ණ කාර්යාලයට  ඇතුල්වීම තහනම් කරන බවට නියෝග කළේය.