(සුජිත් හේවාජුලිගේ )

සෞදි සංවර්ධන අරමුදලේ සහය අඛණ්ඩව ශ්‍රී ලංකාවට ලබාදෙන බව සෞදි තානාපති අබ්දුල්නසර් හුසේන් අල් හාර්ති (Abdulnasser Hussain Al-Harthi) මහතා ජනාධිපති ගෝඨාභය රාජපක්ෂ මහතාට අද (29) පොරොන්දුවිය.

සේවා කාලය නිම කර දිවයිනෙන් පිටත්ව යන සෞදි  තානාපති  අබ්දුල් නසර් මහතා ජනාධිපති කාර්යාලයේදී ජනාධිපතිවරයා අද පෙරවරුවේ හමුවූ අතර ඔහු එම පොරොන්දුව ලබා දුන්නේ ඒ අවස්ථාවේදීය.

සිය ධුර කාලයේදී හුසේන් අල් හාර්ති මහතා  ශ්‍රී ලංකා රජයට දැක්වූ සහාය  ජනාධිපතිවරයාගේ  ප්‍රශංසාවට ලක්විය.

පුනර්ජනනීය බලශක්ති ක්ෂේත්‍රයේ ආයෝජන සහ ශ්‍රී ලංකාවේ ඇති තවත් ආයෝජන අවස්ථා පිළිබඳ සොයා බැලීමට සෞදි රාජ්‍යයේ ඉහළ පෙළේ දූත පිරිසක් නුදුරේදීම ශ්‍රී ලංකාවට පැමිණීමට නියමිත බව හාර්ති මහතා මෙහිදී පැවසුවේය.

ආයෝජන කලාප ආශ්‍රිතව විශේෂ බදු සහන රැසක් ලබාදී ඇති බව මෙහිදී පැවසූ ජනාධිපතිවරයා  ඖෂධ, තාක්ෂණ සහ ඇඟලුම් කර්මාන්තය ආශ්‍රිත සෘජු ආයෝජන සඳහා ශ්‍රී ලංකාවේ  පවතින පුළුල් අවස්ථා පිළිබඳවද  දීර්ඝ විස්තරයක් කළේය.

කොළඹ වරාය නගරයේ සහ හම්බන්තොට ඉදිකිරීමට යෝජිත නැව් අලුත්වැඩියා සහ නිෂ්පාදන ආයතනය ආශ්‍රිතව ඇති ආයෝජන අවස්ථා සඳහා ජනාධිපතිවරයා සෞදි රජයට මෙහිදී ආරාධනා කළේය.

සෞදි සංවර්ධන අරමුදල යටතේ මෙරට යටිතලපහසුකම් සංවර්ධනයට දක්වන සහය ගැන ජනපති ගෝඨාභය රාජපක්ෂ මහතා ස්තූතිය පළ කළේය

මේ අවස්ථාවට ජනාධිපති ලේකම් ගාමිණී සෙනරත්, ජනාධිපති ප්‍රධාන උපදේශක ලලිත් වීරතුංග සහ සෞදි රාජ්‍යයේ මෙරට නියෝජ්‍ය තානාපති අබ්දුල්ලා ඒ. ආර්කොබි (Abdullah a. Aorkobi) යන මහත්වරුන් ඇතුළු පිරිසක්ද සහභාගීවූහ.