( ෂමින් පණ්ඩිතරත්න - ඉතාලියේ සිට)

වෙන්නප්පුව ප්‍රදේශයේ විදේශ සහතික පරිවර්තන ඒජන්සියකින් සැකසූ, ශ්‍රී ලංකාවේ ඉතාලි තානාපති කාර්යාලයේ ව්‍යාජ මුද්‍රා සහිත සහතිකපත් ඉදිරිපත් කරමින් ඉතාලිය පුරවැසිභාවය ඉල්ලුම් කළ ශ්‍රී ලාංකිකයන් එරට පොලිසිය විසින් අත්අඩංගුවට ගෙන අපරාධ නීතිය යටතේ නඩු පවරා ඇත.

ඉතාලියේ වෙසෙන ශ්‍රී ලාංකිකයන් තම පවුලේ සාමාජිකයන් ගෙන්වා ගැනීමට වීසා ඉල්ලුම්පත් සැකසීමේදීද,  එරට පුරවැසිභාවය ඉල්ලුම් කිරීමේදීද හා වෙනත් අවස්ථාවලදී ද තම උපැන්න , විවාහ, පොලිස් වාර්තා සහතික හා අනෙකුත් සහතික පත්‍ර ශ්‍රී ලංකාවේ පිහිටි ඉතාලි තානාපති කාර්යාලයෙන් නීතිගත කිරීම සාමාන්‍යය ක්‍රියාපටිපාටිය වේ.

මෙම සහතික පත් නීතිගත කිරීමේදී  ඉදිරිපත් කළ යුතු අදාළ ලියකියවිලි සැකසීමෙන් සිදුවෙන නොයෙකුත් අපහසුතාවයන් නිසාත් තම පවුලේ සාමාජිකයෙක් හෝ වෙනත් පුද්ගලයකු ඉදිරිපත් කිරීමට නොහැකියාව නිසාත් ඉතාලි ශ්‍රී ලංකා තානාපති කාරයාලයෙන් නම් කර ඇති VSF ආයතනයට අදාළ සහතිකපත් නීතිගත කිරීමට භාරදීම සඳහා වේලාවක් වෙන් කර ගැනීමේදි සිදුවන අපහසුතාවය නිසාත්, ඉතාලියේ වෙසෙන ශ්‍රී ලාංකිකයන් මෙරට තැ‍රැව්කාර ඒජන්සිකට හෝ අතරමැදි පුද්ගලයෙක් නම් කරමින් එම අදාල සහතික පත්‍ර නීත්‍යානුකූලව නීතිගත කරතැයි විශ්වාසය මත විශාල මුදලක් වැය කරමින් ඔවුනට පැවරීමට හුරු පුරුදු වී ඇත.

තම විශ්වාසය බිඳ හෙළමින් වංචනික ලෙස විදේශගත ශ්‍රී ලාංකිකයන්ගේ මුදල් ගසා කන කූඨ ජාවාරම්කාර ඇතැම් තැ‍රැව්කාර ඒජන්සිකරුවන් එම අදාළ සහතික පත් නීත්‍යානුකූලව සකසනවා වෙනුවට ශ්‍රී ලංකාවේ ඉතාලි තානාපති කාර්යාලයේ ව්‍යාජ මුද්‍රා තබමින් සකසා දී තිබීම නිසා එම අදාළ සහතික පත්‍ර පරීක්ෂා කිරීමේදී ව්‍යාජ ඒවා බවට එරට පොලිසිය විසින් හඳුනා ගනිමින් එම ශ්‍රී ලාංකිකයන් අත්අඩංගුවට ගෙන ඔවුන්ට එරෙහිව අපරාධ නීතිය යටතේ නඩු පවරා තිබේ.

වෙන්නප්පුව ප්‍රදේශයේ විදේශ සහතික පරිවර්තන ඒජන්සියක් පවත්වාගෙන යන පුද්ගලයෙක් විසින් මෙම ව්‍යාජ සහතිකපත් සකසා දුන් බවට එම ප්‍රශ්න වලට මුහුණ දුන් ශ්‍රී ලාංකිකයන් මුලික පොලිස් පරීක්ෂණවලදී හෙළි කර ඇති බවට වාර්තාවේ.