(මනෝප‍්‍රිය ගුණසේකර)

ඩිෆෙන්ඩර් රථයකට හා ප‍්‍රාඩෝ රථයකට ඉස්සර කිරීමට ඉඩ ලබානුදුන් බව කියමින් වෑන් රථයේ රියදුරාට පහරදුන් බව කියන ඩිෆෙන්ඩර් රථයේ හා ප‍්‍රාඩෝ රථයේ ගමන් කළ ආරක්‍ෂක නිලධාරීහු දෙදෙනෙක් නීතීඥවරයකු මාර්ගයෙන් කොළඹ අපරාධ කොට්ඨාසයට අද (19)  පස්වරවේ බාරවූහ.

කොළඹ නුවර මාර්ගයේ කළගෙඩිහේන ප‍්‍රදේශයේදී පසුගිය 16 වැනිදා සිදුවූ බව කියන මෙම පහරදීමේ සිද්ධිය සම්බන්ධයෙන් මෙම ආරක්‍ෂක නිලධාරීන් අත්අඩංගුවට ගැනීම සඳහා පොලිස් පරීක්‍ෂණ ආරම්භ කර ඇති බව හෙළි වීමෙන් අනතුරුව අදාළ ආරක්‍ෂක නිලධාරීන් දෙදෙනා මෙලෙස නීතීඥවරයකු මාර්ගයෙන් බාරවී ඇතැයි වාර්තා වේ.

මහදවල් විශාල පිරිසක් බලා සිටියදීම ප‍්‍රධාන මාර්ගයකදී සිදුකළැයි කියන මෙම පහරදීමේ සිද්ධිය සම්බන්ධයෙන් මාධ්‍ය මඟින් විශාල ප‍්‍රචාරයක් ලැබීමත් සමඟ මේ පිළිබඳ විමර්ශන කටයුතු වැඩබලන පොලිස්පතිවරයා විසින් කොළඹ අපරාධ කෙට්ඨාසයට බාර කරන ලදී.

පහර කෑමට ලක්වූ බව කියන වෑන් රථ රියදුරාගෙන් ප‍්‍රකාශ සටහන් කරගත් කොළඹ අපරාධ කෙට්ඨාසයේ නිලධාරීහූ සිද්ධිය සම්බන්ධයෙන් විමර්ශන සිදුකරමින් සිටින අවස්ථාවේදී නීතීඥ හරිත් හෙට්ටිආරච්චි මහතා මාර්ගයෙන් අදාළ ආරක්‍ෂක නිලධාරීන් දෙදෙනා කොළඹ අපරාධ කෙට්ඨාසයට බාර වූහ.