(යොහාන් භාසුර)

විදුලි ගාස්තු සංශෝධනය කිරීමට විදුලිබල මණ්ඩලය ඉදිරිපත් කර ඇති යෝජනාව පිළිබඳව අවසන් තීරණය මේ මස 30 වැනිදා (සිකුරාදා) ගන්නා බව මහජන උපයෝගීතා කොමිසමේ සභාපති මහාචාර්ය මංජුල ප්‍රනාන්දු මහතා අද (28) පැවසීය.

මහජන උපයෝගිතා කොමිසන් සභාව ලබන 30 වන රැස්වී ඒ පිළිබඳ තීරණයක් ගැනීමට නියමිත බව ද මහාචාර්ය මංජුල ප්‍රනාන්දු මහතා සඳහන් කළේය.

වර්තමාන කැබිනට් මණ්ඩලයේ තීරණයකට සෑම වසරකම දෙවරක් විදුලි ගාස්තු සංශෝධනය කිරීමේ තීරණයට අනුව ලබන ජූලි මස 1 වැනිදා විදුලි ගාස්තු සංශෝධනය කිරීමට නියමිතය.

විදුලිබල මණ්ඩලය ඊට අදාල යෝජනාව මීට මාසයකට පමණ පෙර මහජන උපයෝගිතා කොමිසමට ඉදිරිපත් කළ අතර එම කොමිසම ඊට අදාල කටයුතු ඉන් පසුව ආරම්භ කළේය.

එහි වැඳගත් පියවරක් වන මහජන අදහස් ගැනීම පෙරේදා (27) අවසන් කළ අතර එම යෝජනා කොමිසම මේ වන විට සමාලෝචනය කරමින් සිටියි.

විදුලිබල මණ්ඩල මෙම සංශෝධනයේදී විදුලි ගාස්තුව සියයට 3 කින් අඩු කිරීමට යෝජනා කර තිබූ අතර ඇතැම් ඒකක කාණ්ඩවලට සියයට 26 කින් ගාස්තු අඩු වන බව ද විදුලිබල හා බලශක්ති අමාත්‍ය කංචන විජේසේකර මහතා පවසා තිබුණි.