(පියදාස සමරවීර සහ හේමන්ත රණසූරිය)

"කැබිතිගොල්ලෑවෙන් පටාචාර කතාවක්" යන මැයෙන්  "ලංකාදීප" පුවත්පතේ පළ වූ පුවත දැක දානපතීන් උදව් කිරීම නිසා විදුලි බිල හා වතුර බිලට අදාළ හිග මුදලවන රුපියල් අසූදහස් හත්සිය පනහ ගෙවා දැමීමෙන් පසු ඒ මොහොතේ ම ජලය දුන් බව ස්වාමියා අහිමි කැබිතිගොල්ලෑව පදවිය පාරේ පදිංචිව සිටින පී. අනුරාධා ස්වර්ණමාලී කීර්තිරත්න (33) සිවු දරු මව පවසන්නීය.

විදුලි සබදතාව අද 30 වැනිදා දෙන බව පැවැසූවේ යැයි ද ඇය කියයි.

නිවෙසේ මාස හතරක් තිස්සේ විදුලිය විසන්ධි කර සති දෙකක් තිස්සේ ජලය විසන්ධි කර තිබියදී මීට දින පහකට පෙර තම ස්වාමිපුරුෂයා හදිසි අනතුරකින් මිය ගිය බව ඇය පවසන්නීය.

වයස අවුරුදු 11, 09, 02 දරැවන් හා දින 42 ක ලේ කැටි දරුවකු ද සමග තනිවම දැඩි ආර්ථික අපහසුතාවලට ලක්ව කිසිවක් කරකියා ගත නොහැකි ව සිටි මොහොතක "ලංකාදීප" පුවත්පත තම පිහිටට පැමිණි බව ඇය අපට පැවැසුවේ හැඩූ කඳුළෙනි.

"ලංකාදීප" පුවතත් සමග දානපතීන් රැසක්ම තොරතුරු විමසා උදව් උපකාර කළ බව ද එක් මහත්මයකු රුපියල් 70.000ක් ජල හා විදුලි බිල් ගෙවා දමන ලෙස පවසා දුන් බව ඇය ප්‍රකාශ කළාය.

අනුරාධා ස්වර්ණමාලී සිවුදරු මව වැඩිදුරටත් මෙසේ පැවසුවාය.

අද උදේ ඉදලා කෝල් ආවා. අපගේ දුක ගැන ඇහැව්වා. ගිණුම් අංක ඉල්ලාගෙන මුදල් එවා තිබෙනවා. මම එතුමලාට ස්තුති කරන්නේ කොහොමද කියලා තේරෙන්නේ නෑ. මගේ අසරණ දරුවන්ගේ නාමයෙන් අපට උදව්කරනවා. මගේ මහත්තයා ඉන්න තැනකින් සතුටු වෙනවා ඇති මේ වෙලාවේ.

මේ හැම දෙයක්ම වුණේ ලංකාදීප පත්තරේ නිසා. ඇත්තටම මම හීනෙකින් වත් හිතුවේ නෑ අපට මෙතරම් යහපත් දෙයක් වෙයි කියලා. උදව්උපකාර කළ හැමෝටම මම විශේෂ ස්තුතියක් ඉදිරියේ දී කරනවායැයි ඇය පැවැසුවාය.

මේ සම්බන්ධව වැඩිදුර තොරතුරු අවශ්‍ය නම් 071 8358 999 ධම්මකිත්ති හිමියන්ගෙන් හා අප පුවත්පත (011 247 9212) ලබාගත හැකිය. අසරණ වූ මවට දුරකථන පහසුකම් නොමැත.

පී.අනුරාධා ස්වර්ණමාලි කීර්තිරත්න නමින් කැබිතිගොල්ලෑව මහජන බැංකු ශාඛාවේ අංක 150200130046791 දරන අංකයට ද ඇය වෙනුවෙන් මුදල් බැර කළ හැකියි