(ශාන්ත ප්‍රදීප් කුමාර කුලරත්න)

අත් බෝම්බයක් සන්තකයේ තබා ගැනීමේ චෝදනාවක් සම්බන්ධයෙන් වසර එකහමාරක් බන්ධනාගාරගතව සිට ඇප මත නිදහස්ව පැමිණ අයෙකු සති තුනක් ඇතුළත ත්‍රී රෝද රථ පහක්, ‍රන්මාල හා ජංගම දුරකථන කොල්ලකෑමේ සිද්ධියකට අත්අඩංගුවට ගත් බව බස්නාහිර පළාත දකුණ අපරාධ කොට්ඨාසය පවසයි.

මෙම පුද්ගලයා සමඟ තවත් අයෙක් ද  අත්අඩංගුවට ගෙන තිබේ.

මෙසේ අත්අඩංගුවට ගෙන ඇත්තේ රාජගිරිය ඔබේසේකරපුර පදිංචි "ගිහාන් බඩා " (27) සහ රාජගිරියේ පදිංචි "සාදු"  (30) නමින් හඳුන්වන දෙදෙනෙකු බව පොලිසිය කියයි.

"ගිහාන් බඩා " මීට වසර එක හමාරකට පෙර මහජන පීඩාවන් ඇතිවන පරිද්දෙන් අත්බෝම්බයක් සන්තකයේ තබා ගැනීමේ චෝදනාව මත බොරැල්ල පොලිසිය මගින් අත්අඩංගුවට ගෙන වසර එකහමාරක් බන්ධනාගාරගතව සිට මීට සති තුනකට පෙර ඇප මත නිදහස්ව පැමිණි පුද්ගලයෙකි.

ඔහු සමග  ඇතුල්කෝට්ටේ  "ප්ලේන්ටියා" නමැත්තකු ද නිදහස්ව පැමිණ ඇති අතර ඔහු හා එක්ව පෑලියගොඩ ප්‍රදේශයේ සිට ත්‍රී රෝද රථයකින්  කැලණිය ප්‍රදේශයට පැමිණ එහි රියැදුරුගේ ගෙලට තියුණු ආයුධයක් තබා බියගන්වා ඔහු සන්තකයේ තිබූ ජංගම දුරකථන දෙකක් , රුපියල්  6,500 සමග මුදල් පසුම්බියක් සමග ත්‍රීරෝද රථය සමග කොල්ලකා පලා ගොස් තිබුණි.