(විමුක්ති එස් රුද්‍රිගු)

ඇමෙරිකාව සහ ඊශ්‍රායලය පසුගිය 28 වැනිදා ඉරානයට ප්‍රහාර එල්ල කිරීමත් සමග ඇරැඹි ඉරාන යුද්ධය හේතුවෙන් රුසියානු බොරතෙල් ඇතුළුව බලශක්ති නිෂ්පාදන සඳහා ඇති ඉල්ලුම සැලකිය යුතු මට්ටමකින් වර්ධනය වී ඇතැයි ක්‍රෙම්ලිනයේ මාධ්‍ය ප්‍රකාශක දිමිත්‍රි පෙස්කොව් පසුගියදා ප්‍රකාශ කළේය.

රුසියාව සැමවිටම ජාත්‍යන්තර වෙළෙඳපොළ තුළ විශ්වාසවන්ත ගෑස් හා බොරතෙල් සැපයුම්කරුවකු ලෙස කටයුතු කර ඇති බවත් සියලුම ගැනුම්කරුවන්ට ගිවිසුම්ගත පරිදි බොරතෙල් හා ගෑස් සැපයීමට රුසියාවට හැකියාව තිබෙන බවත් ඔහු පැවැසුවේය. චීනය සහ ඉන්දියාව සිය රටවල යහපත උදෙසා රුසියාවෙන් බොරතෙල් මිලදී ගන්නා බවත් එම රටවල් සමග බලශක්ති හා බලශක්ති වෙළඳාම යන අංශයන්ගෙන් සහයෝගීතාව අඛණ්ඩව ඉදිරියට ගෙන යාමට රුසියාව කටයුතු කරනු ඇති බවත් පෙස්කොව් කිවේය.

ඇමෙරිකාව එළැඹෙන අප්‍රේල් මස 4 වැනිදා දක්වා රුසියානු බොරතෙල් මිලදී ගැනීමට අවස්ථා ලබාදීමෙන් පසුව මාධ්‍ය හමුවක් තබමින් ක්‍රෙම්ලිනයේ මාධ්‍ය ප්‍රකාශක දිමිත්‍රි පෙස්කොව් මෙම අදහස් පළ කළේය.