(විමුක්ති එස් රුද්‍රිගු)

බන්ධනාගාර රැදවියන්ගේ සුවදුක් විමසීමට පැමිණිමට නොහැකි ඥාතීන්ට ඔවුන් බැලීම වීඩියෝ තාක්ෂණය ඔස්සේ සිදු කිරීමට හැකි වන පරිදි "ඊ විසිට්" සංකල්පය හඳුන්වා දී තිබෙන බව බන්ධනාගාර කොමසාරිස් ජනරාල් තුෂාර උපුල්දෙණිය මහතා අධිකරණ අමාත්‍යාංශ ශ්‍රවණාගරයේ පැවති මාධ්‍ය හමුවකදී ප්‍රකාශ කළේය.

වයස අවුරුදු 16-22 අතර වයස්වල සිටින මත් ද්‍රව්‍ය සදහා ඇබ්බැහිවීම හේතුවෙන් පුනරුත්ථාපනය වන තරුණයින්ට විදේශ රැකියා සදහා පුහුණුව ලබාදීමට පියවර ගන්නා බවද කොමසාරිස්වරයා කීය. 

බන්ධනාගාර දෙපාර්තමේන්තුවේ ව්‍යුහාත්මක වෙනස්කම් සහ ඉදිරි සැළසුම් පිළිබදව දැනුවත් කිරීම සදහා මෙම මාධ්‍ය හමුව අධිකරණ අමාත්‍යාංශ ශ්‍රවණාගරයේදී පැවැත්විණ.

පස් අවුරුදු සැළැස්මක් අනුව ප්‍රධාන යෝජනා නවයක් යටතේ මෙරට බන්ධනාගාර පද්ධතිය සංවර්ධනය කිරීමේ වැඩ පිළිවෙළක්  ආරම්භ කරමින් ඇති බවත්, බන්ධනාගාර තුළ සිට සිදු කරමින් පැවති වින්දිතයන්ට හා සාක්ෂිකරුවන්ට තර්ජනය කිරීම, ජංගම දුරකථන භාවිතය වැනි කටයුතු පාලනය කරමින් සමස්ත බන්ධනාගාර පද්ධතියම ප්‍රතිසංවිධානයට ලක් කර ඇති බවත් උපුල්දෙණිය මහතා පැවසුවේය.

පෞද්ගලික අංශයේ සහාය ලබා ගනිමින් වෘත්තිමය කුසලතාවලින් පරිපුර්ණව බන්ධනාගාර රැදවියන්ගේ තත්ත්වය උසස් කිරීමට පියවර ගෙන ඇති බවත් ඒ තුළින් රැදවියන්ගේ දක්ෂතාවයන් මෙන්ම ඔවුන්ගේ පවුල්වල සාමාජිකයින් සදහා ආදායම් මාර්ග උපයා ගැනීමේ හැකියාව පවතින බවත් උපුල්දෙණිය මහතා පෙන්වා දුන්නේය.