ඩි.ජී.සුගතපාල

 

දකුණු පළාත්  විශේෂ අපරාධ විමර්ශන ඒකකයේ කොස්තාපල්වරයකු සහ වනසංරක්ෂණ දෙපාර්තමේන්තුවේ බීට්ටු නිලධාරියකු ලබන 13 වැනි දා දක්වා රිමාන්ඩ් බන්ධනාගාර ගතකිරිමට ගාල්ල ප්‍රධාන මහේස්ත්‍රාත් හර්ෂණ කැකුණවෙල මහතා අද (4) නියෝග කළේය.

රත්ගම පුද්ගලයින් දෙදෙනෙකු පැහැරගෙන ගොස් ඝාතනය කළ බව කියන සිද්ධිය සම්බන්ධයෙන් මොවුන් දෙදෙනාව අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන අධිකරණයට ඉදිරිපත් කෙරිණි.

මෙසේ රක්ෂිත බන්ධනාගාරගත කළේ දකුණු පළාත් විශේෂ අපරාධ විමර්ශන ඒකකයේ කොස්තාපල්වරයකු වු හික්කඩුව ගුරුගේ සංජය චානක සහ වලස්මුල්ල කණුමුල්දෙණිය රක්ෂිතයේ බිට්ටු නිලධාරි තුෂාර නලින්ද යන සැකකරුවන් වේ.

රත්ගම රත්නඋදාගමදි පැහැරගෙන ගොස්  අක්මිමණ ගොනාමුල්ල ප්‍රදේශයේදි ඝාතනය කරන ලද පුද්ගලයින් දෙදෙනාගේ සිරුරු පිළිස්සිම සඳහා වලස්මුල්ලේ කණුමුල්දෙණියේ රක්ෂිතයට ගෙන යාම සඳහා ආධාර අනුබලදී ඇත්තේ සැකකාර  බිට්ටු නිලධාරි තුෂාර නලින්ද  නමැත්තා විසින් බව සැකකාර කොස්තාපල්වරයා විසින් අනාවරණය කර ඇත.