(යොහාන් භාසුර)

‘රටම එකට’ මත්ද්‍රව්‍ය නිවාරණ වැඩසටහන ආරම්භ කිරීමෙන් පසුව ශ්‍රී ලංකා රේගු දෙපාර්තමේන්තුව මාස නවයක් තුළ රුපියල් බිලියන 4.5 ක් හෙවත් රුපියල් කෝටි 450 කට අධික වටිනාකමින් යුත් මත්ද්‍රව්‍ය අත්අඩංගුවට ගත් බව රේගු දෙපාර්තමේන්තුවේ මාධ්‍ය ප්‍රකාශක, රේගු අධ්‍යක්‍ෂ චන්දන පුංචිහේවා මහතා අද (30) පැවසීය.  

කොළඹ පිහිටි ‘රටම එකට’ ජාතික මෙහෙයුම් මධ්‍යස්ථානයේදී ඊයේ (30) පැවැති විශේෂ මාධ්‍ය හමුවේදී චන්දන පුංචිහේවා මහතා එසේ පැවසීය.  

‘රටම එකට’ මත්ද්‍රව්‍ය නිවාරණ වැඩසටහන 2025 වසරේ ඔක්තෝබර් මස 30 වැනිදා ආරම්භ කිරීමෙන් පසුව මෙම වසරේ ජූනි මස දක්වා කාලය තුළ ශ්‍රී ලංකා රේගු දෙපාර්තමේන්තුව අත්අඩංගුවට ගැනීම් 55 කින් මත්ද්‍රව්‍ය කිලෝග්‍රෑම් 396 ක් අධික ප්‍රමාණයක් අත්අඩංගුවට ගත් බවත් එම මත්ද්‍රව්‍ය තොගයේ සමස්ත වීථි වටිනාකම රුපියල් බිලියන 4.5 ක් හෙවත් රුපියල් කෝටි 450 කට අධික බවත් ඒ මහතා කීය.

මෙම වසරේ ජූලි මස පමණක් අත්අඩංගුවට ගැනීම් පහකින් මත්ද්‍රව්‍ය කිලෝග්‍රෑම් 25 කට අධික ප්‍රමාණයක් භාරයට ගත් බව කී පුංචිහේව මහතා එම මත්ද්‍රව්‍ය අතර ‘කුෂ්’ නැමැති මත්ද්‍රව්‍ය වැඩි ප්‍රමාණයක් තිබූ බව ද සඳහන් කළේය.

පසුගිය වසරේ ඔක්තෝබර් මස 30 වැනිදා රටම එකට මත්ද්‍රව්‍ය නිවාරණ වැඩසටහන ආරම්භ වීමෙන් පසුව මත්ද්‍රව්‍ය නිවාරණය සඳහා සියලුම රාජ්‍ය ආයතන ඒකාබද්ධව කටයුතු කරන බවත් ඒ අනුව ශ්‍රී ලංකා රේගු දෙපාර්තමේන්තුව ද ඉතාම හොඳ දායකත්වයක් දුන් බවත් ඒ මහතා වැඩි දුරටත් පැවසීය.