( තිළිණි ද සිල්වා )

ශ්‍රී ලංකාවේ යුද හමුදාපතිවරයා පත්කිරීම රාජ්‍ය නායකයාගේ ස්වෛරී තීරණයක් යැයි විදේශ කටයුතු අමාත්‍යාංශය අද (20) නිවේදනයක් නිකුත් නිකුත් කරමින් කියා සිටී.

එසේම මෙම පත්කිරීම සම්බන්ධයෙන් විදේශීය පාර්ශ්වයන් මඟින් ශ්‍රී ලංකාවේ රාජ්‍ය සේවයේ උසස්කිරීම් පිළිබඳ තීරණ හා අභ්‍යන්තරික පරිපාලනමය ක‍්‍රියාවලීන්ට බලපෑම් කිරීමට උත්සාහ දැරීම යුක්ති සහගත නොවන සේම, එය පිළිගත නොහැකි ක‍්‍රියාවක් යැයි ද විදේශ කටයුතු අමාත්‍යාංශය සඳහන් කරයි.

ශ්‍රී ලංකා යුද හමුදාපති ධූරයට ලූතිනන් ජනරාල් ශවේන්ද්‍ර සිල්වා මහතා පත්කිරීම ගැන පළවූ විවිධ පාර්ශවයන් හි අදහස් දැක්වීම් සැළකිල්ලට ගනිමින් විදේශ කටයුතු අමාත්‍යාංශය  නිවේදනයක් නිකුත් කරමින් මේ බව කියා සිටී.

 එම නිවේදනයේ මෙසේ සඳහන් වේ.

‘‘ශ්‍රී ලංකාවේ යුද හමුදාපති පත්කිරීම රාජ්‍ය නායකයාගේ ස්වෛරී තීරණයකි. විදේශීය පාර්ශ්වයන් මඟින් ශ්‍රී ලංකාවේ රාජ්‍ය සේවයේ උසස් කිරීම් පිළිබඳ තීරණ හා අභ්‍යන්තරික පරිපාලනමය ක‍්‍රියාවලීන්ට බලපෑම් කිරීමට උත්සාහ දැරීම යුක්ති සහගත නොවන අතර, එය පිළිගත නොහැකි ක‍්‍රියාවකි.

‘‘චෝදනා මත පදනම්ව, ඇතැම් ද්විපාර්ශ්වික හවුල්කරුවන් සහ ජාත්‍යන්තර සංවිධාන විසින් මෙම පත්කිරීම සැළකිලිමත් විය යුතු තත්ත්වයක් ලෙස පෙන්වා දෙනු ලැබීම කණගාටුවට කරුණක් වන අතර, එය ජාත්‍යන්තර ප‍්‍රජාවේ සියලූම වගකිව යුතු සාමාජිකයින් විසින් අනුගමනය කරනු ලබන ස්වාභාවික යුක්තියේ මූලධර්මවලට පටහැනි වේ.