(සුජිත් හේවාජුලිගේ සහ  අංජුල මහික වීරරත්න)

මහපොළ භාරකාර අරමුදලේ අභ්‍යන්තර විගණක තනතුර පිරවීමට මීට පෙර පැවති ආණ්ඩුවේ වෙළඳ අමාත්‍යාංශ නිලධාරීන් පැහැර හැර අැති  බව පොදු ව්‍යාපාර පිළිබඳ පාර්ලිමේන්තු කාරක සභාවේදී(කෝප්) තොරතුරු අනාවරණය විය.

හිටපු ඇමතිවරයාගේ පෙළඹවීම සහ  බලපෑම අනුව වැඩබලන විගණන  නිලධාරියෙකු දිගින් දිගටම රඳවා ගැනීමට කටයුතු කළ බව අමාත්‍යංශ  නිලධාරීන් එම කමිටුව හමුවේ ප්‍රකාශ කර ඇත.

මහපොළ භාරකාර අරමුදලේ සභාපති විශ්‍රාමික ශ්‍රේෂ්ඨාධිකරණ විනිසුරු විජිත් මළල්ගොඩ මහතා පැවසුවේ මෙතන සිටින එකම විධායක නිලධාරියා තමා පමණක් බවයි.

සේවක මණ්ඩලයක් සිටිනවා යැයි තමා බලාපොරොත්තු වුවත් ඒ ස්ථානයේ අධ්‍යක්ෂවරයකු  ගණකාධිකාරිවරයෙකු  විගණකවරයෙකු  තාක්ෂණක නිලධාරියෙකු  පවා  නැති බවද  ඔහු කීවේය

මෙහිදී අදහස් දැක්වූ මහා පොළ භාරකාර අරමුදලේ හිටපු අධ්‍යක්ෂ පරාක්‍රම බණ්ඩාර මහතා පැවසුවේ හිටපු අමාත්‍යවරයාට වෙළඳ අමාත්‍යාංශය එම වසර දෙකේදී කිසිදු සහයෝගයක් නොදැක්වූ බවයි.

2022 දී මේ අය පත්වන විට තමා ඉවත් කිරීමට උත්සාහ කළ බවත් ඔවුන්  එසේ කටයුතු කළේ ඇමතිවරයාට හිතූ සේ වැඩ කිරීමට ඉඩ නොලැබෙන නිසා බවත්  හෙතෙම සඳහන් කළේය.

එම නිසා තමාගේ තනතුර නතර කළ බවත් ප්‍රධාන විධායක නිලධාරී තනතුරට පත් වූ අවස්ථාවේදී එය පාවිච්චි නොකරන ලෙස දැනුම් දුන් බවත් හෙතෙම කීය.