(ශාන්ත ප්‍රදීප් කුමාර කුලරත්න)

කොරෝනා වයිරසය ආසාදනය වීම හේතුවෙන් මුල්ලේරියාව අයි.ඩී.එච් රෝහලේ ප්‍රතිකාර ලබමින් සිටි පුද්ගලයකු අද (24) ද අලුයම 2.30 පමණ එම රෝහලෙන් පැනගොස් ඇතැයි වැඩබලන පොලිස්පති සී.ඩී. වික්‍රමරත්න මහතා පවසයි.

මෙසේ පැන ගිය පුද්ගලයා 42 හැවිරිදි වියේ පසුවන්නෙකු බවද අනාවරණය වී ඇත. ඇවිද යන විට ඔහුගේ වම් පාදයේ කිසියම් ආබාධයක් පෙන්නුම් කරන බවත් කිසියම් අයකු මොහු දුටුවහොත්, ඔහු අල්ලා ගැනීම වෙනුවට  පහත සඳහන් දුරකථන අංකවලට වහාම දැනුම් දෙන ලෙසත් ඒ මහතා  වැඩිදුරටත් කීය.

මෙම පුද්ගලයා අධික ලෙස මත්ද්‍රව්‍යයට ඇබ්බැහි වීම නිසා කන්දකාඩු පුනරුත්ථාපන මධ්‍යස්ථානයේ ප්‍රතිකාර ලබමින් සිටියදී කොරෝනා වයිරසය වැළඳීමෙන් පසුගිය 15 දා, අයිඩීඑච් රොහලට ඇතුළත් කර ඇති බව ද  පැවසේ.

වාට්ටු අංක හතරෙහි ප්‍රතිකාර ලබමින් සිටී මෙම පුද්ගලයා බිත්තියේ කවුළුවකින් එළියට පැන බටයක ආධාරයෙන් බිමට බැස මෙසේ පැන ගොස් ඇතැයි රෝහල් ආරංචි මාර්ග පවසයි. රෝහල් සේවකයකු ඇඳ මත  රෝගියා නොසිටීනු දැක ඒ බව බලධාරීන්ට දන්වා  මෙසේ සොයන්නට වූ බවද එම ආරංචි මාර්ග වැඩිදුරටත්  වැඩිදුරටත් පවසයි .

රෝගියා පැන යාමට පෙර කිසියම් අයෙකු ඇඳ මත සිටින ආකාරයට ඇඳ මත කොට්ට තබා ඒ මතින් ඇඳ ඇතිරිල්ලක් ද පොරවා  මෙසේ පැන ගොස් ඇතැයිද පැවසේ.

රෝගියා පැන යාමත් සමග විශේෂ කාර්ය බලකායේ සහ පොලිසියේ නිලධාරීන් 100 දෙනකු  පමණ පැමිණ අලුයම තුනේ පමණ සිට  රෝහල අවට ප්‍රදේශයේ පූර්ණ පරීක්ෂාවක් ආරම්භ කර ඇති බව ද කියයි. ඒ අනුව මොහු පිළිබඳව කිසියම් තොරතුරක් ඇතොත් වහාම 119  හා 0718-591017, 0718-592290 සහ 0718-591864 යන අංක අංක වලට අමතා තොරතුරු ලබා දෙන ලෙස ද පොලිසිය ඉල්ලා සිටි.