(බිමල් ශ්‍යාමන් ජයසිංහ)

මාලඹේ තොරතුරු තාක්ෂණ විදුහලේ නිපුන ධනුෂ්ක රාමනායක සිසුවා පැහැරගෙන ගොස් නිරුවත් කර පහරදීම සම්බන්ධයෙන් කොළඹ මහාධිකරණයෙන් බරපතල වැඩ සහිත සිරදඬුවම් නියම වූ පයාගල පොලිස් ස්ථානයට අනුයුක්ත උප පොලිස් පරික්ෂකවරයාගේ රාජකාරී වැඩ කළුතර කොට්ඨාස භාර ජ්‍යෙෂ්ඨ පොලිස් අධිකාරිවරයා විසින් තහනමට ලක්කර ඇතැයි උසස් පොලිස් නිලධාරියෙක් පැවසීය.

එම නිලධාරියා 2009 වසරේදී කොළඹ අපරාධ කොට්ඨාසයේ රාජකාරී සිදු කරමින් සිටියදී එම වසරේ අගෝස්තු මස 8 වෙනිදිනත් 21 වෙනි දිනත් ආසන්න කාලයකදී නිපුණ දනුෂ්ක රාමනායක සිසුවා සිර කර තැබීමේ අදහසින් පැහැරගෙන යාම හෝ ඒ සඳහා අනුබල දීමට එකඟවීමෙන් කුමන්ත්‍රණය කිරීම සම්බන්ධයෙන් එම නිලධාරිය ඇතුළු නිලධාරින් පස්දෙනකුට සහ සිවිල් පුද්ගලයන් දෙදෙනකුට චෝදනා එල්ල වී තිබිණි.

එම නඩු තීන්දුවට ප්‍රකාරව චූදිත උප පොලිස් පරීක්ෂකවරයා ශ්‍රී ලංකා ප්‍රජාතාන්ත්‍රික සමාජවාදී ජනරජයේ ආයතන සංග්‍රහයේ දෙවන කාණ්ඩයේ පරිච්ඡේදය යටතේ කියැවෙන ව්‍යවස්ථාවට අවනත නොවීම, රාජ්‍ය සේවය අපකීර්තියට පත්වන අයුරින් කටයුතු කිරීම යන වැරදි සිදු කර ඇතැයිද තවද අපකීර්ති දායක හැසිරීම ,මහජනයාගෙන් කෙනෙකුට අවනීත අන්දමින් හෝ පීඩාකාරී අන්දමින් හැසිරීම හා අපරාධයකට හෝ වරදකට වරදකරුවීම යන වැරැදි සිදුකර ඇති බව නිරීක්ෂණය වේ.