(යොහාන් භාසුර)

ඉන්දියාව පසුගිය වසරේ (2022) සංචාරකයින් ලක්‍ෂයකට අධික සංඛ්‍යාවක් සමඟ නැවත වරක් ශ්‍රී ලංකාවට විශාලතම සංචාරක ප්‍රභවයක් වූ බවත් ශ්‍රී ලංකාවේ සිටින සෑම සංචාරකයින් පස් හය දෙනෙකුගෙන් එක් අයෙක් ඉන්දියානුවෙක් බවත් ශ්‍රී ලංකාවේ ඉන්දීය නියෝජ්‍ය මහ කොමසාරිස් විනෝද් කේ. ජේකබ් මහතා අද (7) පැවසීය.

ඉන්දියාව මෙම වසරේ ද ශ්‍රී ලංකාවේ සංචාරක ප්‍රස්ථාරයේ ඉහළින්ම සිටින බව ද කී නියෝජ්‍ය මහ කොමසාරිස්වරයා ඉදිකිරීම් සහ බලශක්ති ප්‍රදර්ශනයේ සමාරම්භක උත්සවයට සහභාගී වීමට ලැබීම ගෞරවයක් බව ද සඳහන් කළේය.

ශ්‍රී ලංකාවේ ඉන්දීය නියෝජ්‍ය මහ කොමසාරිස් විනෝද් කේ ජේකබ් මහතා කොළඹදී අද (7) පැවති ඉදිකිරීම් සහ බලශක්ති ප්‍රදර්ශනයේ (2023) සමාරම්භක උත්සවයේදී එසේ පැවසීය. එහිදී නියෝජ්‍ය මහ කොමසාරිස්වයා වැඩි දුරටත් මෙසේ ද පැවසීය.

“මෙම ප්‍රදර්ශනය සඳහා ඉන්දියානු සමාගම්වල උද්යෝගීමත් සහභාගිත්වය පිළිබඳව මා විශේෂයෙන් දිරිමත් කළා. ඉන්දීය සමාගම් 50කට ආසන්න සංඛ්‍යාවක් මෙයට සහභාගි වී සිටිනවා. මෙය ඉන්දියාව සහ ශ්‍රී ලංකාව අතර ශක්තිමත් ආර්ථික හා වාණිජ සබඳතාවයට සාක්ෂියක්.

ඉන්දියාවේ සහ ශ්‍රී ලංකාවේ ජනතාව අතර සමීප සබඳතාව පසුගිය වසර තුන තුළ පෙන්නුම් කළා. ඉන්දීය රජයේ ‘පළමුව අසල්වැසියා’ ප්‍රතිපත්තියට අනුකූලව, මෙම කාල සීමාව තුළ කොවිඩ් වසංගතය, ආර්ථික අර්බුදය සහ දේශපාලන නැගිටීම්වල අභියෝගයට මුහුණ දීමට ඉන්දීය මහ කොමසාරිස් කාර්යාලය ශ්‍රී ලංකාවේ ආර්ථික හා සමාජ අමාත්‍යාංශවලට නොසැලී සහාය දුන්නා.

ඇමරිකානු ඩොලර් බිලියන 4ක් වටිනා ඉන්දියාවේ මූල්‍ය සහ මානුෂීය සහයෝගය අයි.එම්.එෆ්.හි සමස්ත අපේක්ෂිත විස්තීරණ අරමුදල් පහසුකමට වඩා බෙහෙවින් වැඩියි. ජාත්‍යන්තර මූල්‍ය අරමුදලේ ක්‍රියාවලිය ආරම්භ කිරීමට අවශ්‍ය මූල්‍ය සහතික ලබාදුන් පළමු ණයහිමි රට ඉන්දියාවයි. ජපානය සහ පැරිස් සමාජය සමඟ ණය හිමියන්ගේ කමිටුවේ සම සභාපතිවරයෙකු ලෙස ඉන්දියාව තවදුරටත් හොඳ කාර්යභාරයක් ඉටු කරනු ඇත.

මේ වසරේ ජනවාරි මාසයේදී විදේශ කටයුතු අමාත්‍ය ආචාර්ය එස්. ජයශංකර්ගේ සාර්ථක ශ්‍රී ලංකා සංචාරය, යටිතල පහසුකම්, නිෂ්පාදන සහ සම්බන්ධතා ප්‍රවර්ධනය සඳහා ආයෝජනය තුළින් තවදුරටත් සහයෝගීතාව සඳහා මංපෙත් විවර කළා. ඉන්දියාව 2022 දී ශ්‍රී ලංකාවේ විශාලතම වෙළඳ හවුල්කරුවා විය. ඉන්දියාවට ශ්‍රී ලංකාවේ අපනයන ද වර්ධනය වී ඇත. වෙළඳ පියවීම් සඳහා රුපියල් භාවිතා කිරීම ශ්‍රී ලංකාවේ ආර්ථිකයට තවදුරටත් උපකාරී වේ. මේවා ශ්‍රී ලංකාවේ ආර්ථික ප්‍රකෘතිය සහ වර්ධනයට උපකාර වන සංයුක්ත පියවරයන් වේ. චෙන්නායි - යාපනය ගුවන් ගමන් නැවත ආරම්භ කිරීම දෙරටේ ජනතාව සමීප කිරීමේ තවත් පියවරකි. දෙරට අතර යාත්‍රා සේවා තවදුරටත් ශක්තිමත් කරනු ඇත.

සුවසැරිය 1990 ගිලන්රථය, ඉන්දියානු නිවාස ව්‍යාපෘතිය, පාසල් ප්‍රතිසංස්කරණය, රෝහල් ඉදිකිරීම සහ අනෙකුත් සමාජ හා ආර්ථික ව්‍යාපෘති වැනි ප්‍රයෝජනවත් මහජන සේවා ලබාදී ඇති ප්‍රමුඛ සංවර්ධන සහයෝගීතා හවුල්කාරිත්වය ඉන්දියාවයි.

ඉන්දියාව සහ ශ්‍රී ලංකා සබඳතාවල මෑතකාලීන වර්ධනයන් අපගේ මිත්‍රත්වය සහ සර්වකාලීන සහයෝගීතාව ශක්තිමත් කර ඇත. ඒ අතරම, විශේෂයෙන්ම සමුද්‍රීය ආරක්ෂක ක්ෂේත්‍රය තුළ ඇති පොදු අභියෝගවලට මුහුණ දීම සඳහා දෙරට සුපරීක්ෂාකාරීව සිටිනවා.

අප මේ තත්ත්වයට පැමිණ ඇත්තේ වත්මන් මොහොතේ ශ්‍රී ලංකාව වෙනුවෙන් දැඩි ලෙස පෙනී සිටීමට ජනතාව, ව්‍යාපාරික කවයන් සහ ඉන්දීය රජය අධිෂ්ඨාන කර ඇති බැවිනි” යැයි නියෝජ්‍ය මහකොමසාරිස්වරයා වැඩි දුරටත් සඳහන් කළේය.