(නිමල කොඩිතුවක්කු)

සිරස මාධ්‍යවේදී කණ්ඩායමකට එල්ල වූ ප්‍රහාරය හා අග්‍රාමාත්‍යවරයාගේ පුද්ගලික නිවසට ගිනි තැබීම තරයේ හෙලා දකින  බව සාධාරණ සමාජයක් සඳහා වූ ජාතික ව්‍යාපාරයේ  සභාපති හිටපු කථානායක කරු ජයසූරිය මහතා පවසයි.

මෙම සිදුවීම් දෙකම ශිෂ්ට සමාජයේ පිළිකුලට ලක්වන බරපතළ හා තිරශ්චීන ක්‍රියාවන් බැවින් ඒවාට අදාල වගකිවයුත්තන්ට තරාතිරම නොබලා නීතිය හමුවේ දඩුවම් ලබාදිය යුතු බවත් ජයසූරිය මහතා නිවේදනයක් නිකුත් කරමින් සඳහන් කරයි.

සාධාරණ සමාජයක් සඳහා වූ ජාතික ව්‍යාපාරයේ  සභාපති හිටපු කථානායක කරු ජයසූරිය මහතා නිකුත් කළ නිවේදනයේ  තවදුරටත් මෙසේද සඳහන් වේ.

"ප්‍රජාතන්ත්‍රවාදය හා ජනතාවගේ නිදහස උදෙසා රටේ ජනතාව මැදිහත්ව සිදුකරමින් සිටි දැවැන්ත අරගලය අතරතුර අසන්නට ලැබුන ම්ලේච්ඡ සිදුවීම් දෙකක් පිළිබඳව අප අතිශයින්ම කම්පාවට පත්වීමු.

එකී සිදුවීම් දෙක වන්නේ ජනතාවගේ තොරතුරු දැනගැනීමේ අයිතිය වෙනුවෙන් සිය කාර්‍යභාරය ඉටුකරමින් සිටි සිරස මාධ්‍ය ආයතනයේ මාධ්‍යවේදිනියක ද ඇතුළු මාධ්‍ය කණ්ඩායමකට පොලිස් විශේෂ කාර්ය බලකායට අයත් නිළධාරීන් පිරිසක්  විසින් සිදුකර ඇති ප්‍රහාරය සහ අග්‍රාමාත්‍යවරයාගේ පුද්ගලික නිවසට කිසියම් පිරිසක් විසින් ගිණි තබා විනාශ කිරීමයි.

මෙම සිදුවීම් දෙකම ශිෂ්ට සමාජයේ පිළිකුලට ලක්වන බරපතළ හා තිරශ්චීන ක්‍රියාවන්ය. එම සිදුවීම් දෙකම අප තරයේම හෙලාදකින්නෙමු. එමෙන්ම ඒවාට අදාල වගකිවයුත්තන්ට තරාතිරම නොබලා නීතිය හමුවේ දඩුවම් ලබාදිය යුතු බව අවධාරණය කරන්නෙමු. පොලිස් විශේෂ කාර්ය බලකායේ ප්‍රධානීන් විසින් වහාම ක්‍රියාත්මක වී අදාළ නිලධාරින්ට එරෙහිව විනය පියවර ගැනීම වැදගත් වේ.

අද වනවිට රටතුළ උද්ගතව ඇති දැවැන්ත දේශපාලන හා ආර්ථික  මෙන්ම සමාජ අර්බුදයට විසදුමක් සොයා යෑමේදී මහජනතාව ඒ පිළිබදව දැනුවත් කිරීම අතිශයින්ම වැදගත්ය. එහිදී මාධ්‍ය සතු කාර්යභාරය අති විශාලය. මේ වනවිට ප්‍රතිකාර ලබමින් සිටින එම මාධ්‍යවේදී කණ්ඩායමට ඉක්මන් සුවය ප්‍රාර්ථනා කරන අතර සිරස මාධ්‍ය ආයතනය ඇතුළු සමස්ත මාධ්‍ය සමාජයටම ඔවුන් ඉටුකරමින් සිටින කාර්‍යභාරය වෙනුවෙන් අපගේ ස්තුතිය පිරිනමන්නෙමු.

එමෙන්ම අග්‍රාමාත්‍ය රනිල් වික්‍රමසිංහ මහතාගේ පුද්ගලික නිවසට ගිනි තැබීමද අප තරයේම හෙලාදකින්නෙමු. ප්‍රජාතන්ත්‍රවාදී දේශපාලනය තුළ විසම්මුතියට ඉහළම ගරුත්වයක් තිබිය යුතුය. වෙනස් වූ දේශපාලන මතයක් දැරීමට ඇති අයිතිය පිළිනොගන්නා සමාජයකට යහපත් ඉදිරි පැවැත්මක් තිබිය නොහැකිය.රටේ අනාගත පරපුරේ නාමයෙන් හෝ ඉදිරියේදී මෙවැනි තත්වයන් ඇති නොවීමට සමාජයක් ලෙස අප වගබලාගත යුතුව තිබේ. ඒ සදහා රටේ සමස්ත සමාජයේම අවධානය යොමුවනු ඇතයි අප අපේක්ෂා කරන්නෙමු. මෙම සිදුවීම පසුපස සැඟවුණු බලවේග ඇත්දැයි සොයාබැලීමද වැදගත් වේ.

රට යථා තත්වයට පත්වනු දැකීම අපගේ ඒකායන පරමාර්ථයයි. මෙහිදී පාර්ලිමේන්තුවට මෙන්ම මුළු මහත් සමාජයටම ජාතික වගකීමක් ඇති බව ගෞරවයෙන් පෙන්වා දිය යුතුව ඇත.