(රෝහණ චන්ද්‍රදාස)

ශ්‍රී ලංකා භික්ෂු විශ්ව විද්‍යාලය හෙට  (11) දහවල් 12.00 සිට තාවකාලිකව වසා දැමීමට තීරණය කළ බව අනුරාධපුරේ දී අද (10) සවස රැස් වූ එහි පාලක සභාව ගනු ලැබූ තීරණ දැනුම්දෙමින් පැවැති මාධ්‍ය හමුවේ දී ප්‍රකාශ කෙරිණි.

සියම් මහා නිකායේ මල්වතු පාර්ශ්වයේ අනුනායක නියංගොඩ විජිතසිරි නාහිමි ප්‍රමුඛ මහා සංඝරත්නය එම පාලක සභා රැස්වීම අනුරාධපුරේ සම්බුද්ධ ජයන්ති විහාරස්ථානයේ දී අද (10) සවස රැස්වී ගනු ලැබූ තීරණ අනුව සියලුම ශිෂ්‍ය භික්ෂූන් වහන්සේ  භික්ෂු විශ්ව විද්‍යාලයීය පර්ශ්‍රයෙන් හා නේවාසිකාගාරවලින් හෙට (11) දහවල් 12ට පෙර ඉවත්විය යුතු බවට ද දැනුම් දුන්නේය.

භික්ෂු විශ්ව විද්‍යාලයේ මහෝපාධ්‍යය කනත්තේගොඩ සද්ධාරතන නාහිමියන්ගේ ක්‍රියා කලාපයන්‍ට එරෙහිව ශිෂ්‍ය භික්ෂූහු පසුගිය  07 වැනිදා සිට අඛණ්ඩ සත්‍යග්‍රහයක නියැළෙති.

ශිෂ්‍ය භික්ෂූන්ගේ ක්‍රියා කලාපයන් ගිහියන් තරමටවත් නොගැළපෙතියි පාලක සභාව අවධාරණය කර සිටී.  ජ්‍යෙෂ්ඨ ශිෂ්‍ය භික්ෂූන් දස නමකගේ ශිෂ්‍යභාවය තහනම් කර ඇත්තේ විනය කමිටුවේ තීරණ මත බව ද ඒ සඳහා මහෝපාධ්‍යය හිමියන් කිසිදු බලපෑමක් ද කර නැති බවත් එවැනි තීරණ ගැනීමට ඒ හිමියන්ට භික්ෂු විශ්ව විද්‍යාල පනතින් ඉඩක් නැතැයි ද පාලක සභාව සඳහන් කරයි.