(යොහාන් භාසුර)

රුපියල් කෝටියකට වඩා බදු පොලු තැබූ එක්දහස් දෙසීයකට අධික පිරිසකගෙන් බදු එකතු නොකර මෙරට සෑම පුද්ගලයෙක්ගෙන්ම රුපියල් 30,000 බැගින් වැට් බදු අය කිරීම අසාධාරණ බව එක්සත් ජනරජ පෙරමුණේ නායක, පාර්ලිමේන්තු මන්ත්‍රී පාඨලී චම්පික රණවක මහතා පැවසීය.

ආර්ථිකය ස්ථායීකරණය වී ඇති බව මතුපිටින් පේන්න තිබුණ ද ආණ්ඩුව සාමාන්‍ය ජනතාව මත අධික බදු බරක් පටවා ජනතාව පීඩාවට පත් කරමින් සිටින බව කී පාඨලී චම්පික රණවක මහතා දේශීය ආදායම් දෙපාර්තමේන්තුවට රුපියල් කෝටියට වඩා බදු පොලු තැබූ ජාවාරම්කාර ව්‍යාපාරිකයන් 1,212 ක් සිටින බව ද සඳහන් කළේය.

වැට් බදු වැඩි කර මේ රටේ පොඩි දරුවාගේ සිට මහලු පුද්ගලයා දක්වා එක් අයෙකුගෙන් රුපියල් තිස්දාහස බැගින් බදු වශයෙන් අයකර ගැනීමට ආණ්ඩුව කටයුතු කරමින් සිටින බව ද රණවක මහතා කීය.

රට ගොඩනැගීම සඳහා ප්‍රායෝගික වැඩසටහනක් අවශ්‍ය බවත් ඒ සඳහා පුළුල් දේශපාලන සන්ධානයක් ඉදිරියේදී සැකසීම වෙනුවෙන් කැපවෙන බවත් ඒ මහතා වැඩිදුරටත් ප්‍රකාශ කළේය.

පාඨලී චම්පික රණවක මහතා බෙන්තරදී පැවති ජන හමුවකදී එසේ පැවසීය.