(ෂේන් සෙනෙවිරත්න)

අනුන්ගේ වත්තකින් පුවක් වල්ලක් කැඩිමට ගොස් ඇද වැටී මියගිය පුද්ගලයකුගේ මරණය සම්බන්ධයෙන් පැවැති මරණ පරික්ෂණයේදී මියගිය පුද්ගලයා දින දෙකක් තිස්සේ කුසගින්නේ සිටි අයකු බවට  මහනුවර ජාතික රෝහලේ විශේෂඥ අධිකරණ වෛද්‍ය ඒ.පී. ජයසූරිය මහතා අනාවරණය කර ඇත.

මෙසේ මියගොස් ඇත්තේ ගම්පෙළ නාඋල්ලේ පදිංචි 30 හැවිරිදි අවිවාහකයෙකි.

කඩුගන්නාව නාවුල්ල ප්‍රදේශයේ ඉඩමකට ඇතුළු වී හොර රහසේ පුවක් ගසකට නැග පුවක්වල්ලක් සොරකම් කිරීමට උත්සාහ කිරීමේදී සැකකරු  එම පුවක් ගසෙන් ඇද වැටී පෙරේදා (13) මියගියේය.

ආහාරයක් නොමැති නිසා පුවක්වල්ල කැඩීමට යන්නට ඇතැයි සැක කෙරේ.   

මියගිය අය පුවක් ගසකට නගිමින් සිටියදී එසේ ඇද වැටී මිය ගොස් ඇති බව පොලිස් විමර්ශනවලදී අනාවරණය වී තිබේ .

කාත්කවුරුත් නැති මොහුට ස්ථීර ආදායක් නොමැති බව ද මරණ පරීක්ෂණයේදී ඔහුගේ ඥාතීන් පවසා ඇත.

පුවක් ගසෙන් වැටීමෙන් සිසුම්නාවට දැඩි හානි සිදුවීම නිසා මෙම මරණය සිදුව ඇතැයි ද මරණ පරික්ෂණයේදී අනාවරණය විය.