(යොහාන් භාසුර)

ශ්‍රී ලංකා පොදුජන පෙරමුණේ පළාත් සභා අපේක්‍ෂකයන් තේරීමේ කමිටුවේ ප්‍රධානියා ලෙස හිටපු අමාත්‍ය ජොන්ස්ටන් ප්‍රනාන්දු මහතා පත්කළ බව එම පක්‍ෂයේ මහ ලේකම් හිටපු පාර්ලිමේන්තු මන්ත්‍රී, නීතිඥ සාගර කාරියවසම් මහතා අද (5) පැවසීය.

බත්තරමුල්ල, නෙළුම් මාවතේ පිහිටි ශ්‍රී ලංකා නිදහස් පක්‍ෂ මූලස්ථානයේදී එම පක්‍ෂයේ විධායක සභා රැස්වීම පක්‍ෂ නායක හිටපු ජනාධිපති මහින්ද රාජපක්‍ෂ මහතාගේ ප්‍රධානත්වයෙන් අද (5) පස්වරුවේ පැවැත්විණි.

එම විධායක සභා රැස්වීමේදී එළඹි තීරණ පිළිබඳව කළ විමසුකදී සාගර කාරියවසම් මහතා එසේ පැවසීය.

මෙම රැස්වීමේදී පක්‍ෂ අභ්‍යන්තර තීරණ රැසකට එළඹි බව කී කාරියවසම් මහතා පැවසුවේ පළාත් සභා අපේක්‍ෂකයන් තේරීමේ ප්‍රධාන කමිටුවට අමතරව පළාත් හෝ දිස්ත්‍රික් මට්ටමින් අනුකමිටු පත්කිරීමට නියමිත බවත්ය.

ප්‍රධාන කමිටුවට පක්‍ෂය සහ බිම් මට්ටමේ දේශපාලනය පිළිබඳව හොඳ අවබෝදයක් ඇති හිටපු ඇමතිවරු ඇතුළු සාමාජිකයන් රැසක් ඇතුළත් වන බවත් පක්‍ෂයක් ලෙස පළාත් සභා මැතිවරණයට ශ්‍රී ලංකා පොදුජන පෙරමුණ සූදානම් බවත් සාගර කාරියවසම් මහතා වැඩි දුරටත් සඳහන් කළේය.