(ශ්‍රීනාත් ප්‍රසන්න ජයසූරිය)

මීගමුව කටාන විද්‍යාලෝක මහා විද්‍යාලයේ අවුරුදු උත්සවය සැමරීම සඳහා මැටි ගසා පොල් අතු සෙවිලි කර ගැමි ගෙදරක  ආකාරයට ඉදිකර තිබූ ගොඩනැගිල්ල කිසියම් පිරිසක්  ගිනි තැබීම නිසා එම ගොඩනැගිල්ල මුළුමනින්ම විනාශ වී ගොස් ඇතැයි පොලිසිය පවසයි.

විද්‍යාලීය සිසු සිසුවියන් ඔවුන්ගේ මවුපියන් සහ ආචාර්ය මණ්ඩලය එක්වී මෙම ගොඩනැගිල්ල මෙවර පාසල ආරම්භ කිරීමට ප්‍රථම සිට සති ගානක් මුළුල්ලේ වෙහෙස වී සාදා නිම කළ බවවිදුහලේ ආචාර්ය මණ්ඩලය පවසයි සිංහල අලුත්අවුරුදු උත්සවය සැමරීම සදහා ඉදිකළ මෙම ගොඩනැගිල්ල සිංහල අලුත් අවුරුද්ද සැමරීමෙන් පසු පාසල් සිසු සිසුවියන්ගේ අධ්‍යාපන කටයුතු කරගෙන යෑමට පන්ති කාමරයක් වශයෙන් පවත්වාගෙන යෑමට නියමිතව තිබු එකක් බව ආචාර්ය මණ්ඩලය පවසයි.

පාසල් සිසු සිසුවියන්ට අධ්‍යාපන කටයුතු කරගෙන යෑමට ඇතිව තිබූ ඉඩකඩ මදිකම නිසා මෙය ඒ සඳහා පන්ති කාමරයක් වශයෙන් පවත්වාගෙන යෑමට සැලසුම් කර තිබූ බව ආචාර්ය මණ්ඩලය වැඩිදුරටත් පවසයි.

මෙම ගොඩනැඟිල්ල තුළ බඩුමුට්ටු ද තිබුණු බව පොලීසිය පවසයි.