(සුජිත් හේවාජුලිගේ සහ  නිමන්ති රණසිංහ)

ජාතික පශු සම්පත් සංවර්ධන මණ්ඩලය පසුගිය වසරේදී (2021) රුපියල් දාහතර කෝටි පනස් ලක්ෂයකට වැඩි ලාභයක් උපයා ගෙන ඇත.

කාලයක් තිස්සේ පාඩු ලැබූ ආයතනයක් වන එම  මණ්ඩලය 2019 වර්ෂයේදී  පමණක් ලැබූ පාඩුව  රුපියල් කෝටි 32 කට වැඩිය.

ජාතික පශු සම්පත් මණ්ඩලය  2019 වර්ෂයේදී විවිධ ණය හිමියන්ට රුපියල්  කෝටි 60කට වැඩි මුදලක් ණයවී සිටි   අතර එම ණය ප්‍රමාණය  2022 අප්‍රේල් 30 වැනි දිනට  කෝටි 28ක්  දක්වා අඩු කරගෙන  ඇතැයි එහි ආරංචි මාර්ගවලින් පැවසේ.

මේ අතර එම ආයතනය 2017,2018 සහ 2019 යන වර්ෂවලට අදාල  අවසාන ගිණුම් සකස් කර නොතිබූ අතර මේ වනවිට 2021 වර්ෂය දක්වා  සියලු වර්ෂවල ගිණුම් සකස් කර අවසන් කර ඇතැයි  වාර්තා වේ.

ගෝඨාභය රාජපක්ෂ මහතා ජනාධිපතිවරයා ලෙස සිටියදී ජාතික පශු සම්පත් මණ්ඩලය සඳහා  පත් කෙරුණු අධ්‍යක්ෂ මණ්ඩලය වසර දෙකක සේවා කාලයෙන් පසු පසුගිය අගෝස්තු මස ඉල්ලා අස්විය. මෙම  අධ්‍යක්ෂ මණ්ඩලය පත් කෙරුණේ  2020 ජනවාරි මස 3 වැනිදාය.

එම කාලයේදී  ජාතික පශු  සම්පත් මණ්ඩලයේ සභාපතිවරයා ලෙස කටයුතු කළේ මහාචාර්ය  මංජුල සුමිත් මාගමගේ මහතාය.