පොලිස් ලොක්කාට ජරාව දෙන්න ගිය කතකට මාංචු

(බිමල් ශ්‍යාමන් ජයසිංහ)

ගංජා සමග අත්අඩංගුවට ගත් සැමියාට විරුද්ධව මහාධිකරණයේ නඩු නොපවරන ලෙස ඉල්ලා අවිස්සාවේල්ල පොලිසියේ අපරාධ අංශයේ ස්ථානාධිපතිවරයාට පොලිසිය තුළදී රුපියල් ලක්ෂ එකහමාරක අල්ලස් මුදලක් ලබා දුන් කාන්තාවක අල්ලස් හෝ දූෂණ විමර්ශන කොමිසමේ නිලධාරීන් අත් අඩංගුවට ගත් බව අවිස්සාවේල්ල පොලිසිය කියයි.

අවිස්සාවේල්ල පොලීසියට ලද තොරතුරක් අනුව, උපාය දූතයකු ලවා සැකකාරියගේ සැමියා ගංජා ජාවාරම් කරමින් සිටියදී රුපියල් 27 000ක මුදලක් දී ගංජා ග්‍රෑම් සියයක් ලබා ගැනීමෙන් අනතුරුව සැකකරු පදිංචි නිවස වටලා පරික්ෂා කිරීමේදී ගංජා කිලෝ තුනක් සොයා ගැනීමට හැකි වූ බව පොලිසිය කියයි.

අනතුරුව සැකකරු අධිකරණය වෙත ඉදිරිපත් කිරීමෙන් අනතුරුව පැය 72 රඳවා ගැනීමේ නියෝග මත වැඩිදුර ප්‍රශ්න කිරීම සඳහා පොලිසියේ රඳවාගෙන සිටිය දී සැකකාරිය පැමිණ අපරාධ අංශයේ ස්ථානාධිපතිවරයා හමුවී තම සැමියාට විරුද්ධව  මහාධිකරණයේ නඩු නොපවරන ලෙසත් ඒ වෙනුවෙන් රුපියල් ලක්ෂ දෙකහමාරක මුදලක් ලබා ලබාදෙන බවට පවසා තිබූ බව පොලිසිය කියයි.

අපරාධ අංශයේ ස්ථානාධිපතිවරයා ඒ පිළිබඳ සිතාවක කොට්ඨාස ර ජ්‍යෙෂ්ඨ පොලිස් අධිකාරී කේ ඒ ජේ කොඩිතුවක්කු මහතා දැනුවත් කිරීමෙන් සැකකාරිය සම්බන්ධයෙන් අල්ලස් හෝ දූෂණ විමර්ශන කොමිෂමේ නිලධාරීන්ට පැමිණිලි කරන ලෙස ලබා දුන් උපදෙස් අනුව සැකකාරිය අත් අඩංගුවට ගැනීමට හැකි වූ බව පොලිසිය කියයි.