(නිමන්ති රණසිංහ)

අපරාධ පරීක්ෂණ දෙපාර්තමේන්තුව පැමිණිලිකරුවන් සමග වංක සහයෝගයෙන් කටයුතු කරමින් තිලිනි ප්‍රියමාලි සම්බන්ධයෙන් වන සාධාරණ නඩු විභාගයකට ඇති අයිතිවාසිකම අහිමි කර ඇතැයි සඳහන් කරමින් නීතිඥයින් පිරිසක් ඊයේ (08) මානව හිමිකම් කොමිසමට පැමිණිල්ලක් ඉදිරිපත් කර ඇත.

අපරාධ පරීක්ෂණ දෙපාර්තමේන්තුව තම සේවාදායකාවගේ ප්‍රකාශ ලබාගෙන පැය කිහිපයක් ඇතුළත විද්‍යුත් හා මුද්‍රිත අන්තර්ජාල මෙන්ම සමාජ මාධ්‍ය ජාලාවල එම ප්‍රකාශවල සඳහන් අතිශය සංවේදී සහ රහස්‍ය තොරතුරු ප්‍රසිද්ධියේ පළ වීම දිගින් දිගටම සිදුවන බවද එම නීතිඥයින් පැමිණිල්ලේ සඳහන් කර තිබේ.

ඊට අමතරව අපරාධ පරීක්ෂණ දෙපාර්තමේන්තුව භාරයට ගන්නා හඬ පට හා වීඩියෝ දර්ශන පවා මෙලෙසින් සමාජ මාධ්‍යයට මෙන්ම මාර්ගයට යොමු වීම සිදුකර ඇති බවත් මෙය ආණ්ඩුක්‍රම ව්‍යවස්ථාව අනුව මූලික අයිතිවාසිකම් කඩවීමක් බවත් හිම පැමිණිල්ලේ සඳහන්ව ඇත .

ඒ අනුව අපරාධ පරීක්ෂණ දෙපාර්තමේන්තුව සිදුකරන මෙම ක්‍රියාව පිළිබඳව කඩිනමින් සොයා බලා විමර්ශනයක් ආරම්භ කරන ලෙසටද එම පැමිණිල්ලෙන් මානව හිමිකම් කොමිසමෙන් ඉල්ලා තිබේ .