( බන්ධුල ඉලේපෙරුම)  

රජය මගින් කොවිඩ් 19 වැළැක්වීමේ අරමුණින් ගැසට් කර ඇති සෞඛ්‍ය නීති රීති රටටම අදාළ වුවද පාර්ලිමේන්තුවට අදාළ නැත්ද යන්න විපක්ෂ නායක සජිත් ප්‍රේමදාස මහතා අද පාර්ලිමේන්තුව ආරම්භයේදීම කථානායකවරයාගෙන් විමසීමක් කළේය.

“මේ නීති හදන තැන. එතනම නීති කඩ කරනවානම් වැඩක් නෑ. දැන් ඔබතුමාත් මාස්ක් එකක් දාලා නෑ. අපි කථාකරද්දී මාස්ක් දාන්න ඕනද නැද්ද?, මේ ගැන තීරණයක් දෙන්න” යනුවෙන් විපක්ෂ නායකවරයා විමසීය.

විපක්ෂ නායකවරයාගේ ප්‍රකාශයට පිළීතුරු දෙමින් දිනේෂ් ගුණවර්ධන ඇමැතිවරයා කියා සිටියේ පක්ෂ නායක රැස්වීමේදී සියලු දෙනාගේ එකඟත්වයෙන් මෙම සතියේ පාර්ලිමේන්තු රැස්වීම් පැවැත්වීමට තීරණය කළ බවයි. එසේම පවිත්‍රා වන්නිආරච්චි සෞඛ්‍ය ඇමැතිවරිය කියා සිටියේ ගැසට් නිවේදනය හරියට කියවන ලෙසයි. එහි පොදු ස්ථාන ලෙස සඳහන් වන අතර ඊට පාර්ලිමේන්තුව අයත් නොවන බවයි.

“මුුළු ලොවටම ඇසෙන්න ඇමතිතුමිය කියන්නේ පාර්ලිමේන්තුවට එක නීතියක් රටට එක නීතියක් බවයි” යනුවෙන් විපක්ෂ නායකවරයා එහිදී චෝදනා කළේය. මේ හේතුවෙන් සභාව උණුසුම් ස්වභාවයක් ගෙන ඇත.

මේ අතර තමන්ගේ ප්‍රශ්න කිරීමෙන් පසු කථානායකවරයාත් මුව ආවරණ පැළඳීම ගැන ස්තූතිවන්ත වන බවද විපක්ෂ නායකවරයා කියා සිටියේය.