(අංජුල මහික වීරරත්න)

මෙම වසරේ ඉදිරි මාස පහ සඳහා  දෙහිවල සතුන්වත්තේ සිටින සතුන්ට ආහාර සැපයීමට  රුපියල් මිලියන 20ක මුදලක් ලබා දීමට මහා භාණ්ඩාගාරය එකඟත්වය පළ කළ බව කෘෂිකර්ම වන ජීවී සහ වන සංරක්ෂණ අමාත්‍ය  මහින්ද අමරවීර මහතා පැවසීය.

පවතින ආර්ථික අර්බුදකාරී  තත්ත්වය නිසා  දෙහිවල සත්වොද්‍යානයේ සතුන්ට ආහාර සැපයීමට අවශ්‍ය මුල්‍ය ප්‍රතිපාදනවල හිඟයක්  මතුව තිබිණි .

නඩු භාණ්ඩ ලෙස සත්වෝද්‍යානයට යොමු කර සිටින අලි විශාල ප්‍රමාණයක් නඩත්තු කිරීමේ වගකීම ද අධිකරණය විසින් දෙහිවල සත්වොද්‍යානය වෙත පවරා තිබු බැවින් වාර්ෂිකව රුපියල් ලක්ෂ 450ක් පමණ ඒ සඳහා වැය කිරීමට සිදු වු බව අනාවරණය විය.

මේ නිසා දෙහිවල සතුන්වත්තේ සිටින සතුන්හට ආහාර සැපයීමට වෙන් කළ මුදල් අවසන් වෙමින් පැවැති අතරම දේශීය හා විදේශීය නරඹන්නන් ප්‍රමාණය අඩුවීම නිසා දෛනික ආදායමේ ද යම් අඩාලවීමක් සිදුවී තිබූ බව අමාත්‍ය මහින්ද අමරවීර මහතා පැවසීය.

මේ සම්බන්ධව අවධානය යොමු කරමින් කෘෂිකර්ම, වනජීවි හා වනසම්පත් සංරක්ෂණ අමාත්‍ය මහින්ද අමරවීර මහතා 2022 වසරේ ඉදිරි මාස 05 සඳහා සතුන්ට අවශ්‍ය ආහාර සැපයීමට මුල්‍ය ප්‍රතිපාදන ලබා දෙන ලෙස  මහා භාණ්ඩාගාරයෙන් ඉල්ලීමක් කරනු ලැබීය.