(විමුක්ති එස් රුද්‍රිගු)

ශ්‍රී ලංකාව සහ ඝානාව වැනි ණය බරින් පීඩිත වී සිටින සංවර්ධනය වෙමින් පවතින රටවලට ණය සහන ලබා දීම සඳහා ජාත්‍යන්තර ණය හිමියන් කඩිනමින් ක්‍රියාමාර්ග ගත යුතු යැයි ඇමෙරිකානු භාණ්ඩාගාර ලේකම් ජැනට් යෙලන් මහත්මිය පවසා ඇත.

ණය බරින් පීඩිත වී සිටින සංවර්ධනය වෙමින් පවතින රටවල ආර්ථිකය යථා තත්ත්වයට පත් කිරීමට හැකි වුවහොත් එය ගෝලීය ආර්ථිකයටද තල්ලුවක් වනු ඇතැයි යෙලන් මහත්මිය ප්‍රකාශ කර තිබේ.සැමීබියාවේ ණය අර්බුදය විසඳීම සඳහා සැලසුමකට එළඹීමට අවුරුද්දකට වැඩි කාලයක් ගත වූ බවත් එම සැලසුම ශ්‍රී ලංකාව සහ ඝානාව වැනි ණය බරින් පීඩිත වී සිටින සංවර්ධනය වෙමින් පවතින රටවලට ණය සහන ලබා දෙමින් එම රටවල ආර්ථිකය යථා තත්ත්වයට පත් කිරීම සඳහා යොදා ගත හැකි බවත් ජැනට් යෙලන් මහහත්මිය පෙන්වා දී ඇත.

රටක් ණය අර්බුදයට පත්වන සෑම අවස්ථාවකදීම ණය සහන ලබා දීම සඳහා පළමු පියවරෙන් පටන් නොගෙන සැමීබියාවේදී එකඟ වූ පොදු ප්‍රතිපත්ති ඒ සඳහා භාවිත කළ යුතු බව ජැනට් යෙලන් මහත්මිය පවසා තිබේ.

ජී20 සමුළුවේ මුදල් අමාත්‍යවරුන්ගේ රැස්වීමට ප්‍රථම ඉන්දියාවේ ගාන්ධිනගර් හි පැවති හමුවකදී ජැනට් යෙලන් මහත්මිය මේ බව ප්‍රකාශ කළාය.