(සුජිත් හේවාජුලිගේ )

ශ්‍රී ලංකාවේ සාමාන්‍ය පවුලක බදුබර 2021 වසරට සාපේක්ෂව 2022 වර්ෂයේ දී සියයට 42 කින් පමණ වැඩි වී ඇතැයි පේරාදෙණිය විශ්ව විද්‍යාලයේ ආර්ථික විද්‍යා සහ සංඛ්‍යාන අධ්‍යයන අංශයේ මහාචාර්ය වසන්ත අතුකෝරල මහතාගේ මූලිකත්වයෙන් කෙරුණු පරීක්ෂණයකදී තොරතුරු අනාවරණයවී ඇත.

ශ්‍රී ලංකාවේ සාමාන්‍ය පවුලක්( සිවු දෙනකුගෙන් යුතු ) මාසයකට රුපියල් 28,000 බදු මුදලක් රජයට ගෙවන බව එම පරීක්ෂණයේදී  තොරතුරු හෙළි වූයේ යැයි මහාචාර්ය වසන්ත අතුකෝරළ මහතා  ලංකාදීපයට පැවැසීය.

භාණ්ඩ මිල ඉහළ යාම නිසා ජනතාව මත පැටවුණු වක්‍ර බදු බර 2021 සිට  2022 දක්වා කාලයේදී තුනකින්  පමණ වැඩිවී ඇති බව  පවසන මහාචාර්යවරයා සාමාන්‍ය පවුලක් මාසයකට ගෙවන වක්‍ර බදු ප්‍රමාණය
රජයේ නව බදු සංශෝධන හේතුවෙන් රුපියල් 4000 කට ආසන්න ප්‍රමාණයකින් ඉහළ ගොස් ඇතැයිද සඳහන් කළේය.

ජාතික දරිද්‍රතා මායිමේ සිටින පවුලක් මේ වසරේ ජූලි මාසයේදී   රුපියල්  3900 ක වක්‍ර බදු ප්‍රමාණයක් මාසිකව ගෙවූ බවත් ඒ අනුව එම පවුලක්  දිනකට රජයට ගෙවූ වක්‍ර බදු ප්‍රමාණය රුපියල් හාරසිය හැටක් බවත්  ඔහු කීවේය.

ලංකාවේ දුප්පත්ම පවුල්  සියයට 10 ගත්විට( පවුල් පන් ලක්ෂ හැත්තෑ දහසක්) රුපියල් 6700 වක්‍ර බදු ප්‍රමාණයක් මාසිකව රජයට ගෙවන බව පවසන වසන්ත අතුකෝරළ මහතා  සමෘද්ධියෙන් රුපියල් 4500ක්  ලැබුණද මේ වක්‍ර බදු ප්‍රමාණය නිසා ඔවුන් රුපියල් 2,200 ක පමණ ශුද්ධ අලාභයක් ලබන බවද  සඳහන් කළේය.

එම දුප්පත් පවුල්වලින් රජය මාසිකව වක්‍ර බදු ලෙස ලබාගන්නා මුදල් ප්‍රමාණය ඔවුන්ගේ ආදායමෙන් සියයට නවයක් බවද ඔහු පැවසුවේය.

පහළම  ආදායම් ලබන සියයට 30ගත්විට ඔවුන් රජයට මාසිකව   රුපියල්  10,600 ක මුදලක් වක්‍ර බදු වශයෙන්  ගෙවන බවත් එය ඔවුන්ගේ ආදායමෙන් සියයට තිස් එකක් බවත්  හෙතෙම ප්‍රකාශ කළේය.

මේ අතර ඉහළ පරිභෝජන මට්ටමක් පවත්වා ගෙන යන පවුල් සියයට තිහ ගත්විට ඔවුන් මාසිකව රජයට වක්‍ර බදු වශයෙන් රුපියල් 56,000 ක් ගෙවන බවද  අතුකෝරල මහතා පැවසීය.

මාසයකට රුපියල් ලක්ෂයකට වඩා ආදායම් උපයන පවුල් ලක්ෂ 11කට වැඩි ප්‍රමාණයක් රටේ සිටින බව ප්‍රකාශ කරන මහාචාර්යවරයා රටේ පොහොසත්ම පවුල් සියයට  10 ( පවුල් 570000ක් ) මාසිකව උපයන ආදායම රුපියල් දෙලක්ෂ තිස්පන්දහසකට  වැඩි බවද  ප්‍රකාශ කළේය.

ලංකාවේ ඍජු බදු ගෙවන්නන් ලක්ෂ තුනකට ආසන්න ප්‍රමාණයක් සිටින බවත් එය සමස්ත ජනගහනයෙන් සියයට 1.3ක් බවත් ඔහු පැවසුවේය.

රජයට බදු ගෙවන සේවා නියුක්ත පුද්ගලයන්ගේ සංඛ්‍යාව සියයට 3.6ක්  බවද අතුකෝරල මහතා පැවසීය.

ශ්‍රී ලංකාවේ ක්‍රියාත්මක වන්නේ අසාධාරණ බදු ක්‍රමයක් බවත්  රජය සිය මුළු බදු ආදායමෙන් සියයට හැත්තෑවක් උපයාගන්නේ වක්‍ර බදු වලින් බවත්  ඔහු කීවේය.

ජනතාව මත පැටවෙන මෙම වක්‍ර බදු උද්ධමනයට සෘජුවම බලපාන බව වසන්ත අතුකෝරල මහතා වැඩිදුරටත් පැවසීය.