(ගයාන් සූරියආරච්චි)

ශ්‍රී ලංකා ගුවන් හමුදාව සංවිධානය කරනු ලබන කොළඹ ගුවන් සංදර්ශනය සහ තාක්ෂණික වෙළෙද ප්‍රදර්ශන ලබන මැයි මස 29 වැනිදා සිට ජූනි 2 දක්වා දින පහක් පෙරවරු 9.00 සිට රාත්‍රී 12 දක්වා ගාලු මුවදොර පෝට් සිටි නගරයේ පැවැත්වීමට නියමිතය.

‘කලම්බු එයර් ෂෝ ඇන්ඩ් ඩිෆෙන්ස් එක්ෂිබිෂන් 2024‘ නමින් එම ප්‍රදර්ශනය සංවිධානය කෙරන අතර ‘අනාගතයට කෙසේ පියනඟන්නේද?‘ යන් තේමා කරගනිමින් එම ප්‍රදර්ශනය පැවැත්වෙන් අතර  ඒ පිළිබදව දැනුවත් කිරීමේ මාධ්‍ය හමුවක් එයාර් මාර්ෂල් උදේනි රාජපක්ෂ මහතාගේ ප්‍රධානත්වයෙන් අකුරේගොඩ ගුවන් හමුදා මූලස්ථානයේදී අද (10)  පැවැත්විණි.

ඒ පිළිබදව අදහස් දක්වමින් ගුවන් හමුදාපති එයාර් මාර්ෂල් උදේනි රාජපක්ෂ මහතා මෙසේ අදහස් පළකළේය.

ශ්‍රී ලංකා ගුවන් හමුදාව මෙතෙක් පවත්වන ලද ප්‍රදර්ශනවලට සමාගාමීව මෙවැනි ප්‍රදර්ශනයක් පවත්වනු ලබන්නේ ප්‍රථම වතාවටයි. ගුවන් තාක්ෂණය උපයෝගී කරගෙන ගුවන් හමුදාවක් ලෙස ඉදිරි අනාගතය ජයගත හැක්කේ කෙසේද?. යනන් පිළිබදව අපි මූලිකව මෙම ප්‍රදර්ශනය මගින් පෙන්වාදීමට සූදානම් වෙනවා.

ඒ අනුව අන්තර්ජාතික වශයෙන් ඉන්දියාව, පාකිස්ථානය, බංග්ලාදේශය, චීනය වැනි රටවල ගුවන් භටයන්ට ඔවුන්ගේ හැකියා ප්‍රදර්ශනය කිරීමටත් අපි ඔවුන්ට ආරාධනා කර තිබෙනවා. මේවනවිට ඩ්‍රෝන තාක්ෂණය, රේසර් තාක්ෂණයට පිවිස තිබෙනවා. මෙම ප්‍රදර්ශනය තුළින් සංචාරක කර්මාන්තය ප්‍රවර්ධනය කිරීමටත් අපි බලාපොරාත්තුව වෙනවා.

දැනටමත් ලංකාව සමග කටයුතු කරනු ලබන අන්තර්ජාතික සමාගම් සමූහයක් අපට සහයෝගය ලබාදීමට අපට කැමැත්ත පළකර තියෙනවා. එමෙන්ම අප අතර සිටින දක්ෂතා ඇති තරුණයන්ට ගුවන් හමුදාවට එකතුවීමට අවස්ථාව එදින ලබාදීමට කටයුතු කරනවා.  ප්‍රදර්ශනය පැවැත්වෙන දින පහේම උදේ 9.30 සිට 10.30 දක්වා ගුවන්  හමුදාව සහ ශ්‍රීලන්කන් ගුවන් සමගාම ඇතුළු සියලුම දේශීය ගුවන් සමාගම් සම්බන්ධ කරගෙන ගුවන් සංදර්ශන ඉදිරිපත් කිරීමටත් බලාපොරොත්තු වෙනවා.

ඊට අමතරව ජාතික සහ අන්තර්ජාතික සංචාරකයන්ට ගුවන් පැරෂුට් පැනීම, හෙලිකොප්ටර් චාරිකා, සංගීත සංදර්ශන, පැෂන් ෂෝ, ඩ්‍රෝන යාත්‍රා සංදර්ශන, ගේම් ෂෝ, ලේසර් ප්‍රදර්ශන ඇතුළුව නවමු අත්දැකීමක් ලබාදීමට මෙම ප්‍රදර්ශනය සංවිධානය කරන බවය.

මෙම අවස්ථාවට ගුවන් හමුදා මාධ්‍ය අධ්‍යක්ෂ ගෘෘප් කැප්ටන් දුෂාන් විජේසිංහ, ගුවන් හමුදා මාණ්ඩලික ප්‍රධානී  එයාර් වයිස් මාර් ෂල් සම්පත් වික්‍රමරත්න, ගුවන් සංදර්ශන හා තාක්ෂණික වෙළෙද ප්‍රදර්ශනයේ නියෝජ්‍ය අධ්‍යක්ෂ ගුවන් කොමදෝරු අසේල ජයසේකර යන මහත්වරු ඇතුළු ගුවන් භට පිරිසක් සහභාගිවූහ.