(සුජිත් හේවාජුලිගේ සහ යොහාන් බාසුර)

කොළ පැහැති ඇඳුමකින් සැරසුණු කණ්ඩායමක් කොළඹ ගාලු මුවදොර පිටියේ වාහන ගාල් කිරීම සඳහා  හිතුමතේ  විවිධ ගාස්තු  අය කිරීම හේතුවෙන් ජනතාව දැඩි දුෂ්කරතාවයට පත් වෙති.

මෙලෙස මුදල් අය කිරීම ඉතා අසාධාරණ බව ජනතාව පෙන්වා දෙති.

විවේක ගැනීමට ඉතා කුඩා වේලාවකට පැමිණෙන ජනතාවගෙන්ද මේ අය  මුදල් අය කරන බව ඔවුහු  චෝදනා කරති. මෙරට ජනතාවගෙන්  මුදල් අය කිරීමේදී මීට වඩා සාධාරණ ක්‍රමවේදයක් අනුගමනය කළ යුතු බව ජනතාව පෙන්වා  දෙති.

මේ සම්බන්ධයෙන් අප කොළඹ මහ නගර සභාවේ නිලධාරියකුගෙන් කළ  විමසුමකදී ඔහු පැවසුවේ ඒ සම්බන්ධයෙන් කරුණු සොයා බලන බවයි.

මේ අතර කොළඹ නගරයේ බොහෝ ස්ථානවල වාහන ගාල් කිරීමට යම් යම් කණ්ඩායම් හිතුමතේ  මුදල් අය කරන බව පවසන වාහන හිමිකරුවෝ   එදිනෙදා කටයුතු සඳහා  පැමිණෙන ජනතාවට මුදල් අය කිරීමෙන් තොරව වාහන ගාල් කිරීම සඳහා නගරයේ  නිදහස්  ස්ථාන වෙන් කිරීම ඉතා වැදගත් බව  රජයට යෝජනා කරති.