(යොහාන් භාසුර)

ශ්‍රී ලංකාව තුළ ඉන්ධන අළෙවි කරන සියලුම ආයතනවල ඉන්ධන මිල එකම අගයකට පත්නොකළ හොත් දැඩි ක්‍රියාමාර්ගයකට එළඹෙන බව ඛනිජ තෙල් බෙදුම්කරුවන්ගේ සංගමය විදුලිබල හා බලශක්ති අමාත්‍යංශයේ ලේකම්වරයාට ලිඛිතව දැනුම්දී තිබේ.

ඉදිරි ඉන්ධන මිල සංශෝධනයකදී සියලුම ආයතන එකම මිලක් යටතේ හෝ තරගකාරිත්වය අනුව සුළු වෙනසක් යටතේ ඉන්ධන අළෙවි කිරීමට පරිසරය සකස් නොකළ හොත් සංගමයක් ලෙස පියවර ගන්නා බව ඛනිජ තෙල් බෙදුම්කරුවන්ගේ සංගමයේ සභාපති ෂෙල්ටන් ප්‍රනාන්දු මහතා යොමු කළ ලිපියේ සඳහන් වේ.

ඛනිජ තෙල් බෙදාහැරීමේ ආයතන නියාමනය කිරීමට නියාමන ආයතනයක් පිහිටුවන්නේ යැයි විදුලිබල හා බලශක්ති අමාත්‍ය කංචන විජේසේකර මහතා පැවසූ බවත් හැකි ඉක්මණින් එම නියාමන ආයතනය පිහිටුවිය යුතු බවත් ෂෙල්ටන් ප්‍රනාන්දු එම ලිපියෙන් වැඩි දුරටත් සඳහන් කර තිබේ.